Avokatët anёtarё tё organeve drejtuese tё Dhomёs sё Avokatisё nuk ndihen gati të hyjnë në sallat e GJKKO-së pa laptopët dhe celularët e tyre. Aq serioz është halli, sa Dhoma Kombëtare e Avokatisë ka vendosur të bojkotojë pa afat seancat në Gjykatën e Posaçme, deri në pezullimin e rregullores së re që kufizon futjen dhe përdorimin e pajisjeve elektronike në ambientet e saj.
Por bojkoti nuk është vetëm një thirrje për solidaritet profesional. Dhoma ka vendosur edhe se çfarë do të ndodhë me avokatët që nuk pajtohen me të dhe zgjedhin të futen në sallë e të bëjnë punën e tyre.
Maks Haxhia e tha hapur pas mbledhjes së Këshillit të Përgjithshëm: avokatët që dalin kundër vendimit do të procedohen disiplinarisht dhe masat mund të shkojnë deri në heqjen e licencës.
“U vendos që bojkoti të mos zbatohet kundër masave të sigurimit apo të dënimit që janë në procesin e amnistisë”, deklaroi Haxhia, duke shtuar se për ata që nuk respektojnë bojkotin do të ketë procedim disiplinor, “me masa ekstreme të heqjes së licencës”.
Pra, kush mendon se mund ta ushtrojë mbrojtjen edhe pa celular në xhep e laptop në tavolinë, duhet të mendohet edhe një herë. Jo për shkak të GJKKO-së, por të vetë Dhomës së Avokatisë.
Një organizatë që duhet të mbrojë pavarësinë profesionale të avokatëve, përballë një rregulloreje që e konsideron të papranueshme, përgjigjet duke kufizuar në anën tjetër pavarësinë e anëtarëve të vet: ose bojkotoni, ose rrezikoni procedim disiplinor.
Kёtё herё Dhoma e Avokatisë ka zgjedhur të përplaset drejtpërdrejt me GJKKO-në për një rregullore sigurie, duke e kthyer çështjen e telefonave dhe laptopëve në një bojkot institucional. Në vend që debati të zgjidhet juridikisht, përmes kundërshtimit të aktit, kërkesës për pezullim apo negociimit të një regjimi të arsyeshëm për përdorimin e pajisjeve, zgjidhja është: seancat le tё ndalen.
E në këtë klimë, avokatia shqiptare rreshtohet edhe një herë në një front që prodhon presion mbi institucionet e drejtësisë së posaçme, pikërisht në një periudhë kur këto institucione janë nën sulm të vazhdueshëm politik.
Mund të ketë argumente serioze kundër rregullores së GJKKO-së. Një avokat sot punon me dosje elektronike, akte, jurisprudencë dhe dokumente që mund t’i ketë në laptop; një ndalim absolut mund t’ia vështirësojë realisht mbrojtjen.
Por nga kjo deri te kërcënimi se kolegut që hyn në sallë mund t’i hiqet licenca, ka një distancë të madhe.
Në fund, përballë rregullores së GJKKO-së, Dhoma zgjodhi rregulloren e vet: pa celular e laptop nuk hyjmë; kush hyn, përgjigjet para nesh.
