Një gjykatë federale në Shtetet e Bashkuara ka refuzuar të bllokojë zhvillimin e eventit spektakolar UFC Freedom 250, duke i hapur rrugë organizimit të ndeshjeve të arteve marciale të përziera në lëndinën jugore të Shtëpisë së Bardhë, pikërisht në ditëlindjen e 80-të të presidentit Donald Trump.
Vendimi u mor nga gjykatësi federal Amit Mehta, i cili hodhi poshtë padinë e dy qytetarëve që kundërshtonin aktivitetin, me argumentin se nuk kishin provuar se preken drejtpërdrejt nga organizimi i tij. Paditësit pretendonin se administrata Trump kishte tejkaluar kompetencat duke lejuar zhvillimin e një eventi sportiv privat në ambientet simbolike të Shtëpisë së Bardhë pa autorizimin e Kongresit.
Me këtë vendim, gjithçka është gati që më 14 qershor të zhvillohet një prej eventeve më të pazakonta në historinë e presidencës amerikane.
Në lëndinën jugore të Shtëpisë së Bardhë është ngritur tashmë një strukturë gjigante metalike rreth 28 metra e lartë, brenda së cilës do të vendoset kafazi oktagonal i UFC-së. Eventi është konceptuar si pjesë e festimeve për 250-vjetorin e themelimit të Shteteve të Bashkuara, por përkon edhe me ditëlindjen e Donald Trump.
Në qendër të mbrëmjes do të jetë përballja mes kampionit të pamposhtur të peshave të lehta, Ilia Topuria, dhe kampionit të përkohshëm Justin Gaethje.
Tensionet mes dy luftëtarëve janë ndezur që para ndeshjes. Gjatë konferencës së fundit për shtyp pranë Memorialit Lincoln në Uashington, Topuria shtyu Gaethje-n gjatë përballjes tradicionale “face-off”, duke detyruar presidentin e UFC-së, Dana White, të ndërhynte për t’i ndarë.
Pas incidentit, Gaethje reagoi me ironi: “Shiko ku jemi, shiko këtë pamje të mrekullueshme dhe ti do të sillesh si kafshë?”
Topuria, nga ana tjetër, deklaroi se synon ta mbyllë sfidën që në raundin e parë.
Përveç duelit kryesor, publiku do të shohë edhe rikthimin e yllit brazilian Alex Pereira, i cili do të tentojë të bëhet kampioni i parë në tri kategori të ndryshme peshe në historinë e UFC-së.
Eventi pritet të transmetohet globalisht dhe konsiderohet një ndër spektaklet më të pazakonta që janë organizuar ndonjëherë në ambientet e Shtëpisë së Bardhë, duke përzier sportin, politikën dhe festimet kombëtare në një skenë të vetme.
Burimi: Al Jazeera / Reuters
