Pretendimet që po qarkullojnë në rrjetet sociale se hantavirusi nuk transmetohet nga njeriu te njeriu janë të pasakta, sipas ekspertëve dhe autoriteteve shëndetësore ndërkombëtare. Shkencëtarët kanë konfirmuar se varianti i virusit i zbuluar në anijen turistike MV Hondius mund të përhapet mes njerëzve, megjithëse transmetimi mbetet i kufizuar dhe virusi nuk konsiderohet shumë ngjitës.
Alarmi u ngrit pasi Organizata Botërore e Shëndetësisë njoftoi më 3 maj vdekjen e tre pasagjerëve në bordin e anijes MV Hondius gjatë një udhëtimi transatlantik. Pas rastit, autoritetet nisën karantinimin dhe monitorimin e personave të dyshuar si të infektuar, ndërsa u aktivizuan edhe procedurat e gjurmimit të kontakteve.
Në rrjetet sociale nisën menjëherë teoritë se masat ishin të ekzagjeruara, duke u bazuar në dokumente të vjetra nga një departament shëndetësor në Kolorado të SHBA-së, ku thuhej se hantavirusi “nuk është ngjitës”. Por ekspertët sqarojnë se dokumenti i referohej një lloji tjetër të virusit, të njohur si “Sin Nombre”, i cili nuk transmetohet nga njeriu te njeriu.
Varianti i identifikuar në MV Hondius ishte “Andes hantavirus”, një formë shumë më e rrallë, për të cilën transmetimi mes njerëzve është dokumentuar shkencërisht. Epidemiologu Mircea Sofonea nga Universiteti i Montpellier-it deklaroi se “Andes është i vetmi hantavirus në këtë grup që ka transmetim të konfirmuar nga njeriu te njeriu”.
Ekspertët theksojnë megjithatë se virusi nuk përhapet lehtësisht si Covid-19 apo gripi. Sipas specialistit francez Bruno Lina, transmetimi kërkon kontakt relativisht të zgjatur me një person të infektuar dhe niveli i përhapjes mbetet i ulët. Ai shpjegoi se koeficienti i transmetimit të hantavirusit është rreth 1, shumë më i ulët krahasuar me Covid-in gjatë pandemisë, ku një person infektonte mesatarisht më shumë se tre të tjerë.
Deri tani janë raportuar vetëm 12 raste të dyshuara ose të konfirmuara të lidhura me shpërthimin në anije. Ekspertët shtojnë se me masa bazë higjiene dhe izolimi, përhapja e virusit mund të kontrollohet shpejt.
(Burimi: Përshtatur nga France 24)
