Arabia Saudite po intensifikon përgatitjet për sezonin e Haxhit 2026, ndërsa autoritetet presin që numri i pelegrinëve të shkojё rreth 2 milionë besimtarë nga e gjithë bota.
Sipas Ministrisë saudite të Haxhit dhe Umres, deri tani në Mbretëri kanë mbërritur mbi 1.5 milionë pelegrinë nga jashtë vendit, shumica përmes aeroporteve ndërkombëtare. Deri në fund të sezonit numri total pritet të arrijë rreth 1.8 deri në 2 milionë pjesëmarrës.
Për të menaxhuar fluksin e madh të besimtarëve, autoritetet saudite kanë shtuar masat organizative dhe të sigurisë, duke përdorur sisteme të avancuara monitorimi, kamera survejimi dhe teknologji për kontrollin e lëvizjes së turmave në vendet e shenjta.
Masat synojnë gjithashtu të ndalojnë hyrjet e paautorizuara në zonat e Haxhit, pas problemeve të viteve të fundit me mbipopullimin dhe temperaturat ekstreme.
Statistikat zyrtare tregojnë luhatjet e mëdha të numrit të pelegrinëve gjatë viteve të fundit:
- Në vitin 2012, Haxhi regjistroi mbi 3 milionë pelegrinë, një nga shifrat më të larta në histori.
- Në vitin 2020, pandemia e COVID-19 e kufizoi pjesëmarrjen në vetëm rreth 10 mijë persona.
- Në vitin 2021, morën pjesë vetëm 58,745 banorë dhe shtetas brenda Arabisë Saudite.
- Në vitin 2022, numri u rikthye në rreth 1 milion pelegrinë.
- Në vitin 2023, Haxhi iu afrua niveleve normale me mbi 1.8 milionë besimtarë.
- Në vitin 2024 u regjistruan 1,833,164 pelegrinë.
- Në vitin 2025 morën pjesë 1,673,230 persona.
Haxhi është një nga pesë shtyllat e Islamit dhe duhet të kryhet të paktën një herë në jetë nga çdo mysliman që ka mundësi fizike dhe financiare për ta realizuar.
(Burimi: AA)
