Ekuinoksi i pranverës në vitin 2026 ishte më 20 mars, në orën 15:46, duke shënuar zyrtarisht fundin e dimrit dhe fillimin e një periudhe me ditë gjithnjë e më të gjata. Por këtë vit, kjo ngjarje astronomike erdhi me një spektakël të veçantë në qiell: në mbrëmje mund tё admirohej takimi magjepsës mes Hënës në formë gjysmëhëne dhe Venusit, planeti më i ndritshëm në qiellin e mbrëmjes.
Ekuinoksi është momenti kur rrezet e Diellit bien pingul mbi ekuatorin e Tokës, duke krijuar një balancë perfekte mes ditës dhe natës. Vetë termi vjen nga latinishtja “aequa-nox”, që do të thotë “natë e barabartë”.
Në Hemisferën Veriore, kjo datë shënon nisjen e pranverës astronomike. Pas saj, orët e dritës rriten gradualisht, deri në arritjen e kulmit në solsticin e verës. Ky cikël është rezultat i pjerrësisë së boshtit të Tokës ndaj planit të orbitës së saj rreth Diellit, gjë që bën që rrezet diellore të bien me kënde të ndryshme gjatë vitit dhe të krijojnë stinët.
Një tjetër kuriozitet interesant është se ekuinoksi nuk bie gjithmonë në të njëjtën datë. Për shkak se viti astronomik nuk përputhet saktësisht me kalendarin, kjo ngjarje mund të luhatet mes 19 dhe 21 marsit. Megjithatë, që nga viti 2008, ekuinoksi ka rënë më 20 mars dhe pritet të vazhdojë kështu deri në vitin 2043. Më pas, do të zhvendoset përkohësisht më 19 mars, për t’u rikthyer sërish në datën 20 deri në vitin 2047.
Ndërsa data 21 mars, që dikur ishte simbolike për fillimin e pranverës, nuk do të rikthehet deri në fund të këtij shekulli.
Këtë vit, përveç domethënies shkencore, ekuinoksi solli edhe një moment poetik në qiell: një “takim” mes Hënës dhe Venusit, që e bën hyrjen në pranverë edhe më të bukur për t’u përjetuar.
(Burimi: ANSA)
