Hoteli Washington Hilton, një nga vendet më simbolike të politikës amerikane, është rikthyer në qendër të vëmendjes si skenë krimi, pas të shtënave me armë gjatë eventit ku ishte i pranishëm presidenti Donald Trump.
Ngjarja e fundit risjell kujtime të errëta historike: pikërisht në këtë hotel, në vitin 1981, u krye atentati ndaj ish-presidentit Ronald Reagan.
Ndërsa Trump ndodhej në sallën kryesore të darkës së Shoqatës së Korrespondentëve të Shtëpisë së Bardhë, një incident me armë zjarri shpërtheu pranë perimetrit të sigurisë. Presidenti u evakuua menjëherë dhe nuk pësoi lëndime.
Ndёrsa më 30 mars 1981, Reagan u qëllua jashtë hotelit, teksa po dilte drejt limuzinës së tij pas një takimi. Plumbi i kalibrit 22 depërtoi nё mushkëri dhe ai iu nënshtrua një operacioni urgjent që zgjati dy orë.
Autori i sulmit të asaj kohe, John Hinckley Jr., plagosi gjithashtu zëdhënësin e Shtëpisë së Bardhë James Brady, një agjent të Shёrbimit Sekret dhe një polic. Brady mbeti pjesërisht i paralizuar dhe më vonë, në nder të tij, salla e konferencave të Shtëpisë së Bardhë mori emrin e tij.
Ironikisht, pas atentatit, Reagan u bë i njohur për humorin e tij të ftohtë në momente kritike, duke i thënë bashkëshortes: “Zemër, harrova të përkulem.”
Hoteli Washington Hilton, i ndërtuar në vitet ’60 dhe i njohur për formën e tij karakteristike në formё “M”-je, ndodhet vetëm pak më shumë se një milje larg nga Shtëpia e Bardhë dhe ka qenë për dekada vendi i eventeve më të rëndësishme politike dhe mediatike në SHBA.
Pas incidentit të fundit, autoritetet konfirmuan se një i dyshuar është arrestuar, ndërsa FBI po vijon hetimet. Edhe pse shërbimi i darkës vazhdoi, presidenti Trump u largua nga hoteli rreth orës 21:45 dhe më pas informoi mediat nga Shtëpia e Bardhë.
“Është një profesion i rrezikshëm,” u shpreh ai.
Ngjarja e fundit rikthen në vëmendje jo vetëm historinë e dhunës politike në SHBA, por edhe sfidat e vazhdueshme të sigurisë, edhe në ambientet më të mbrojtura të vendit.
