Gjykata e Posaçme kundër Korrupsionit dhe Krimit të Organizuar (GJKKO) ka rrëzuar kërkesën e ish-ministrit të Mjedisit, Lefter Koka, për t’u liruar nga qelia. Vendimi u dha nga gjyqtari Erjon Bani, i cili nuk pranoi argumentin e mbrojtjes se kishte kaluar afati trevjeçar i paraburgimit në çështjen e inceneratorit të Fierit.
Koka, një nga figurat kryesore të përfshira në hetimet për aferën e inceneratorëve, do të vazhdojë të qëndrojë në burg në pritje të përfundimit të procesit. Ai pretendonte se periudha e qëndrimit në qeli kishte tejkaluar kufirin ligjor dhe kërkonte lirimin me arsyetimin se po mbahej padrejtësisht në paraburgim.
Ish-ministri i Mjedisit është dënuar më herët me 6 vite e 8 muaj burg për aferën e inceneratorit të Elbasanit, dënim që u dha në kuadër të gjykimit të shkurtuar. Në prill të këtij viti, GJKKO e dënoi gjithashtu me 3 vite burg për inceneratorin e Tiranës, dënim që u reduktua në 2 vite për shkak të procedurës së gjykimit tё shkurtuar.
Koka nuk do të ketë të drejtë të mbajë funksione publike për pesë vite pas përfundimit të dënimit. Ai përballet gjithashtu me një proces tjetër për inceneratorin e Fierit, ku akuzohet për shkelje të detyrës dhe korrupsion në bashkëpunim me ish-zyrtarë të tjerë të Ministrisë së Mjedisit dhe të Bashkisë së Tiranës.
Vendimi i fundit i GJKKO-sё konfirmon qëndrimin e drejtësisë për të mos lejuar lirimin e ish-ministrit para kohe, duke e lënë atë pas hekurave deri në përfundim të plotë të procedurave gjyqësore.
