Prokuroria e Posaçme Kundër Korrupsionit dhe Krimit të Organizuar (SPAK) ka regjistruar emrin e zëvendëskryeministres dhe ministres së Infrastrukturës dhe Energjisë, Belinda Balluku, si person nën hetim për akuzën e “shkeljes së barazisë në tendera”.
Sipas burimeve mediatike, numri dy i qeverisë “Rama 4” është thirrur të paraqitet në SPAK të hënën, në bazë të një fletëthirrjeje të firmosur nga prokurori i posaçëm Dritan Prençi. Fletëthirrja i është dorëzuar Ballukut në ambientet e ministrisë që ajo drejton.
Në dokumentin e thirrjes, SPAK i kërkon që të jetë e shoqëruar nga një avokat, çka tregon se gjatë seancës së ardhshme mund t’i komunikohet akuza penale, sipas procedurave të parashikuara në ligj. Ky zhvillim nënkupton se ndjekja penale ndaj saj pritet të ushtrohet pa kërkuar masë sigurie, duke shmangur kështu nevojën për autorizim nga Kuvendi i Shqipërisë.
Megjithëse SPAK nuk ka dhënë detaje mbi çështjen specifike që po hetohet, burime pranë prokurorisë bëjnë me dije se ndaj zëvendëskryeministres janë depozituar disa kallëzime penale, mes tyre edhe ajo që lidhet me tenderin e tunelit të Llogarasë, ku vlera e kontratës me një kompani turke u rrit me mbi 50 milionë euro.
Në të njëjtën kohë, mësohet se SPAK ka kryer kontrolle në banesat e disa bashkëpunëtorëve të afërt të Ballukut, përfshirë dy ish-zyrtare të ministrisë.
Ky zhvillim vjen në një periudhë kur SPAK ka intensifikuar hetimet ndaj disa zyrtarëve të lartë aktualë e ish-zyrtarëve të qeverisë, duke shtuar tensionet në skenën politike.
