Një ishull i vogël grek ka vendosur të luftojë rënien demografike duke u dhënë 3 mijë euro familjeve për çdo fëmijë që lind.
Bashkia e Nisyros, ishull me pak më shumë se 1 mijë banorë të përhershëm në Dodekanez, ka miratuar njëzëri bonusin prej 3,000 eurosh. Përfitues do të jenë familjet që janë banore të regjistruara dhe jetojnë në mënyrë të përhershme në ishull në momentin e lindjes së fëmijës.
Pagesa do të jetë e menjëhershme dhe pa taksa, me synimin për të ndihmuar prindërit me shpenzimet e para të një të porsalinduri.
“I thamë PO familjes, PO së ardhmes”, deklaroi kryebashkiaku Christofis Koronaios.
Por Nisyros kërkon të shkojë edhe më tej. Bashkia ka vendosur si objektiv që në të ardhmen të japë 150 euro në muaj për çdo fëmijë deri në moshën 5-vjeçare. Nëse masa realizohet, kjo do të përkthehej në deri 9 mijë euro të tjera për një fëmijë gjatë pesë viteve të para të jetës.
Nisma vjen ndërsa Greqia përballet me një krizë të fortë demografike. Në vitin 2024 në vend u regjistruan vetëm 68,467 lindje, 4.2% më pak se një vit më parë, ndërsa numri i vdekjeve arriti në 126,916, pothuajse dyfishi i lindjeve.
Për ishuj të vegjël si Nisyros, ku largimi i të rinjve mund të kërcënojë drejtpërdrejt të ardhmen e komunitetit, çdo familje e re dhe çdo lindje marrin një rëndësi të veçantë.
Për vitin 2026, bashkia ka parashikuar 9 mijë euro në buxhet për bonusin e lindjeve, një shumë që mjafton për tre fëmijë.
