Një grua që kishte fituar 1 milion euro në lotari e hodhi pa dashje biletën fituese në një kosh mbeturinash në qytetin Bitonto, në jug të Italisë, duke detyruar kompaninë vendore të pastrimit të organizonte një kërkim që zgjati me orë të tëra.
Punonjësit e pastrimit në Bitonto arritën të rikuperonin biletën fituese me vlerë 1 milion euro, pasi u desh të kontrollonin një kamion të tërë të mbushur me mbeturina. Administratori i kompanisë së menaxhimit të mbetjeve SANB, Roberto Nicola Toscano, i tha agjencisë franceze të lajmeve AFP se bileta u gjet “mrekullisht ende e paprekur”.
Toscano tregoi se mori telefonatën e dëshpëruar nga gruaja, e cila kishte fituar çmimin e madh, por ndërkohë kishte humbur biletën.
Gruaja, identiteti i së cilës nuk është bërë publik, kishte marrë pjesë në shortin e së shtunës dhe të dielën shkoi në pikën ku e kishte blerë për të verifikuar rezultatin.
Megjithatë, pajisja elektronike shfaqi mesazhin “non-payable” (“nuk mund të paguhet”), një njoftim i zakonshëm që tregon se shuma e fituar është shumë e madhe për t’u shlyer nga një pikë e vogël shitjeje. Ajo e keqkuptoi këtë mesazh, duke menduar se nuk kishte fituar asgjë.
“Fituesja luante gjithmonë të njëjtët numra, sepse lidhen me kujtimin e një personi të dashur,” tha Toscano.
Sipas gazetës italiane Corriere della Sera, kombinimi fitues ishte 2, 4, 8, 10 dhe 51. Një familjar i gruas e kuptoi se pikërisht ky ishte kombinimi fitues dhe e njoftoi menjëherë, por në atë moment ajo e kishte hedhur tashmë biletën në mbeturina.
Kur u kthyen te pika e shitjes, kamioni i pastrimit kishte zbrazur tashmë koshin ku ndodhej bileta.
Si u gjet bileta?
Pasi SANB u kontaktua nga gruaja, kompania e pastrimit veproi menjëherë për të rindërtuar itinerarin që kishte ndjekur bileta, shpjegoi Toscano për AFP. Punonjësit arritën të identifikonin kamionin e saktë që kishte grumbulluar mbeturinat dhe e ndaluan atë.
Kontrollimi i mbetjeve paraqiste rrezik për shkak të materialeve potencialisht të rrezikshme që mund të ndodheshin mes tyre. Për këtë arsye, kamioni u transportua në një impiant të posaçëm, të pajisur për kryerjen e një kërkimi të tillë në kushte sigurie.
Sipas Corriere della Sera, punonjësve iu desh një ditë e tërë pune, “në kushte aspak të këndshme”, për të gjetur biletën fituese.
Toscano tregoi se gruaja shpërtheu në lot kur mori telefonatën që e njoftonte se bileta ishte gjetur.
Ai deklaroi për gazetën se profesionalizmi, organizimi dhe një dozë e madhe fati bënë të mundur këtë rezultat të jashtëzakonshëm, duke theksuar se pa përkushtimin e punonjësve të pastrimit, një përfundim i tillë do të kishte qenë i pamundur.
Meqenëse SANB është një ent publik, shpenzimet e operacionit të kërkimit do të mbuloheshin fillimisht nga taksapaguesit. Megjithatë, Toscano i tha AFP-së se gruaja kishte premtuar se do të mbulonte të gjitha kostot shtesë të shkaktuara nga operacioni i jashtëzakonshëm i kërkimit.
