Australia e ka nisur me këmbën e mbarë aventurën në Kupën e Botës 2026, duke mposhtur 2-0 Turqinë në sfidën e parë të Grupit D.
“Kangurët” treguan pragmatizëm dhe efikasitet, duke goditur nga një herë në secilën pjesë të lojës për të siguruar tre pikët e para në turne.
Skuadra australiane kaloi në avantazh në minutën e 27-të me talentin Nestory Irankunda, i cili finalizoi me sukses një aksion të shpejtë dhe i dha qetësi ekipit të tij. Turqia u përpoq të reagojë dhe krijoi disa raste të mira shënimi, por mungesa e saktësisë para portës rezultoi fatale.
Në pjesën e dytë, ndërsa turqit kërkonin golin e barazimit, Australia goditi sërish. Ishte minuta e 75-të kur Connor Metcalfe vulosi fitoren me golin e dytë, duke shuar shpresat e ekipit të drejtuar nga Vincenzo Montella.
Falë këtij suksesi, Australia ngjitet në kuotën e tre pikëve në Grupin D, aq sa kanë edhe Shtetet e Bashkuara pas ndeshjes së tyre të parë.
Për Turqinë, e cila siguroi kualifikimin në Botëror përmes fazës play-off, humbja e parë e vë menjëherë nën presion. Ndeshja e ardhshme ndaj Paraguajit konsiderohet vendimtare për shanset e saj për të vijuar më tej në kompeticion.
Pas përfundimit të takimit, trajneri Vincenzo Montella pranoi se skuadra e tij pagoi mungesën e konkretizimit.
“Ky është futbolli. Krijuam raste, por nuk arritëm t’i shfrytëzonim. Australia na ndëshkoi me kundërsulme. Tani duhet të mendojmë për dy ndeshjet e mbetura”, deklaroi tekniku italian.
