Një mesazh i vitit 2021, i bërë publik së fundmi, tregon se epidemiologu Michael Osterholm, i cili ishte pjesë e ekipit këshillimor të Joe Biden për pandeminë e COVID-19, u kishte shprehur Anthony Faucit, drejtueses së atëhershme të Qendrave për Kontrollin dhe Parandalimin e Sëmundjeve (CDC), Rochelle Walensky, dhe zyrtarëve të tjerë të lartë shqetësimin se maskat prej cope ofronin një mbrojtje shumë të kufizuar dhe se qeveria duhej të nxiste përdorimin e maskave tё modelit N95.
Mesazhi është dërguar më 8 gusht 2021, në një periudhë kur administrata Biden vazhdonte të mbështeste përdorimin e maskave si pjesë të politikave kundër COVID-19, ndërsa në shumë shkolla dhe institucione amerikane ishin ende në fuqi kërkesat për mbajtjen e tyre. Osterholm, drejtor i Qendrës për Kërkimin dhe Politikat mbi Sëmundjet Infektive në Universitetin e Minesotës, nuk kundërshtonte përdorimin e maskave në vetvete, por argumentonte se autoritetet duhej të bënin një dallim shumë më të qartë ndërmjet llojeve të tyre.
“Vini re mbrojtjen shumë të kufizuar nga mbulesat prej cope për fytyrën”, shkruante Osterholm, duke shtuar se e mbështeste përdorimin e maskave, por se autoritetet duhej të promovonin modelet N95, edhe në rastet kur këta nuk ishin përshtatur profesionalisht në fytyrën e përdoruesit.
Sipas materialit të publikuar, Osterholm vinte gjithashtu në pikëpyetje studimet ku mbështetej CDC-ja për të argumentuar efektivitetin e maskave prej cope, duke u thënë zyrtarëve se, sipas tij, studimet e përdorura nga agjencia për të mbështetur pretendimin për mbrojtjen e konsiderueshme që ofronin këto maska nuk i rezistonin shqyrtimit shkencor. Ai i kërkonte Faucit, Walenskyt dhe zyrtarëve të tjerë që t’i jepnin publikut një udhëzim më të fortë për përdorimin e N95.
Mesazhi përmban edhe një element tjetër që ka tërhequr vëmendjen pas publikimit të tij. Osterholm e hapte komunikimin duke shkruar se po e dërgonte me mesazh telefonik “për të shmangur çdo çështje FOIA”, duke iu referuar Freedom of Information Act, ligjit amerikan që u mundëson qytetarëve dhe gazetarëve të kërkojnë dokumente të administratës federale.
Komunikimi vinte pas një debati publik që ishte zhvilluar vetëm pak ditë më parë. Guvernatori i Floridës, Ron DeSantis, kishte kërcënuar se do t’u ndërpriste fondet shkollave që detyronin nxënësit të mbanin maska, ndërsa gjatë një konference në Shtëpinë e Bardhë një gazetar kishte përmendur pikërisht qëndrimet e Osterholmit mbi efektivitetin e kufizuar të maskave prej cope.
Sekretarja e atëhershme e shtypit e Shtëpisë së Bardhë, Jen Psaki, ishte përgjigjur duke theksuar se Osterholm nuk ishte më këshilltar i qeverisë dhe se administrata po mbështetej te ekspertët mjekësorë të institucioneve federale. Pas kësaj deklarate, Osterholm hartoi mesazhin drejtuar Faucit, Walenskyt dhe zyrtarëve të tjerë.
Ai iu referua edhe një materiali të American Conference of Governmental Industrial Hygienists, i cili krahasonte shkallën e mbrojtjes së llojeve të ndryshme të maskave dhe respiratorëve, dhe paralajmëroi se një nga problemet që do të mbetej nga menaxhimi i pandemisë ishte theksi i vazhdueshëm i qeverisë mbi “mbajtjen e maskës”, pa i shpjeguar mjaftueshëm publikut se çfarë nënkuptonte në praktikë një mbrojtje efektive.
Mesazhi është siguruar nga senatori republikan Chuck Grassley nga Departamenti amerikan i Shëndetësisë dhe Shërbimeve Njerëzore, në kuadër të kërkesave të tij për dokumente që lidhen me origjinën dhe menaxhimin e pandemisë së COVID-19. Sipas artikullit, Osterholm, Fauci dhe Walensky nuk iu përgjigjën kërkesave për koment përpara publikimit.
Burimi: The Epoch Time
