Një mbrëmje kushtuar historisë, letërsisë dhe traditës shqiptare u zhvillua më 6 korrik në Shaw Theatre të Londrës, ku u prezantua produksioni etno-muzikor “Shqipëria përmes syve të Bajronit” (Albania Through Byron’s Eyes).
Shfaqja solli për publikun britanik vizionin e Lord Bajronit për Shqipërinë, të interpretuar nga shkrimtari dhe aktori Robert Wilton.
E ndërtuar mbi vargjet e “Shtegtimeve të Çajld Haroldit” (Kënga II), vepra rikrijoi udhëtimin e poetit romantik në trojet shqiptare, duke sjellë në skenë imazhin e një vendi të karakterizuar nga trimëria, mikpritja, liria dhe kodi i nderit.
Interpretimi i Robert Wiltonit i dha jetë figurës së Bajronit, ndërsa rrëfimi u pasurua me muzikë tradicionale, valle dhe elemente teatrore që sollën në vëmendje pasurinë e trashëgimisë kulturore shqiptare. Një pjesë e veçantë iu kushtua edhe vlerësimit që poeti kishte për gruan shqiptare, të cilën ai e konsideronte simbol të forcës dhe dinjitetit.
Një nga momentet më të rëndësishme të mbrëmjes ishte performanca e Ansamblit Kombëtar të Këngëve dhe Valleve Popullore, i cili u ngjit në një skenë londineze për herë të parë që nga rënia e regjimit komunist. Pjesëmarrja e ansamblit u realizua me mbështetjen e Agjencisë Kombëtare të Diasporës, duke e kthyer këtë aktivitet në një ngjarje me peshë të veçantë kulturore dhe institucionale.
I organizuar nga Empowered Women of Diaspora në bashkëpunim me British Albanian Youth & Culture, eventi synoi të promovojë kulturën shqiptare në Mbretërinë e Bashkuar dhe të forcojë lidhjet mes dy vendeve përmes artit, historisë dhe trashëgimisë së përbashkët kulturore.
