Përshkallëzimi i konfliktit mes Shteteve të Bashkuara dhe Iranit vazhdon, ndërsa të dyja palët kanë shkëmbyer sulme të reja gjatë orëve të fundit. Irani pretendon se ka goditur baza ushtarake amerikane në Bahrein, Kuvajt dhe Katar, ndërsa Uashingtoni ka kryer natën e dytë radhazi sulme ajrore ndaj objektivave në territorin iranian.
Sipas ushtrisë iraniane, sulmet u kryen me një numër të madh dronësh, duke pasur në shënjestër një sistem raketor Patriot në Kuvajt, një stacion satelitor të paralajmërimit të hershëm në Katar dhe depo karburanti të ushtrisë amerikane në Bahrein.
Forcat e armatosura iraniane deklaruan se “nuk do të lejojnë në asnjë rrethanë realizimin e objektivave të presidentit të pamatur të Shteteve të Bashkuara” dhe se do të vazhdojnë të mbrojnë idealet e Revolucionit Islamik.
Nga ana tjetër, Ministria iraniane e Shëndetësisë bëri të ditur se sulmet amerikane në pesë provinca të vendit gjatë dy ditëve të fundit kanë lënë të vrarë 14 persona dhe kanë plagosur 78 të tjerë.
Gjatë natës janë raportuar shpërthime në disa qytete iraniane përgjatë Ngushticës së Hormuzit, përfshirë Bushehr, Bandar Abbas, Chabahar, Sirik, Jask dhe ishullin Abu Musa. Në qytetin Iranshahr raportohet të ketë humbur jetën të paktën një person.
Presidenti amerikan Donald Trump deklaroi se bombardimet amerikane janë kryer si “hakmarrje” për sulmet që Uashingtoni pretendon se Irani ka ndërmarrë ndaj anijeve tregtare që kalojnë në Ngushticën e Hormuzit.
Ndërkohë, situata ka shkaktuar alarm edhe në vendet e Gjirit Persik. Në Katar, banorët u zgjuan rreth orës 04:00 të mëngjesit nga mesazhe emergjente që i urdhëronin të qëndronin brenda banesave dhe larg dritareve, ndërsa pak më vonë autoritetet njoftuan se rreziku kishte kaluar. Edhe në Bahrein u aktivizuan dy herë sirenat e alarmit ajror dhe qytetarëve iu kërkua të strehoheshin, megjithëse autoritetet nuk kanë konfirmuar zyrtarisht ndonjë sulm.
Korrespondentët në rajon raportojnë se si Uashingtoni ashtu edhe Teherani ndodhen në një ngërç strategjik për kontrollin e Ngushticës së Hormuzit. Sipas analistëve, SHBA kërkon të pengojë Iranin të përdorë ngushticën si mjet presioni, ndërsa Teherani e konsideron kontrollin mbi këtë korridor detar jetik si kartën e tij më të rëndësishme në çdo negociatë të ardhshme.
