Kancelari gjerman Friedrich Merz ka bërë një deklaratë të fortë ndaj Shteteve të Bashkuara, duke thënë se nuk do t’ua rekomandonte fëmijëve të tij të jetonin, studionin apo punonin sot në Amerikë, për shkak të klimës sociale që, sipas tij, ka ndryshuar ndjeshëm nën presidencën e Donald Trump.
Deklarata e Merz vjen në një moment tensionesh të forta mes Uashingtonit dhe aleatëve europianë, ku përplasjet për luftën në Ukrainë, konfliktin me Iranin, tarifat tregtare dhe rolin e NATO-s kanë krijuar krisje të dukshme në marrëdhëniet transatlantike.
Duke folur para të rinjve në një konventë katolike në Würzburg, kancelari gjerman tha se Gjermania ofron sot më shumë mundësi për të rinjtë sesa SHBA.
“Besoj fort se ka pak vende në botë që ofrojnë kaq shumë mundësi për të rinjtë sa Gjermania”, deklaroi Merz.
Ai shtoi se nuk do t’i këshillonte më fëmijët e tij të ndërtonin jetën në Amerikë.
“Nuk do t’u rekomandoja fëmijëve të mi të shkonin sot në SHBA për studime apo për të punuar, sepse atje është krijuar papritur një klimë sociale krejt tjetër”, tha kancelari 70-vjeçar.
Sipas tij, edhe njerëzit më të arsimuar në SHBA po e kanë gjithnjë e më të vështirë të gjejnë punë.
Deklaratat e Merz konsiderohen një tjetër goditje politike ndaj Donald Trump, me të cilin raportet janë tensionuar javët e fundit.
Muajin e kaluar, Merz irritoi presidentin amerikan pasi deklaroi se SHBA po “poshtërohej” në përplasjen me Iranin. Pak ditë më vonë, Uashingtoni njoftoi tërheqjen e pjesshme të trupave amerikane nga Gjermania dhe vendosi tarifa të reja ndaj makinave të Bashkimit Europian, sektor ku ekonomia gjermane mbështetet fuqishëm.
Trump reagoi ashpër ndaj kancelarit gjerman, duke thënë se Merz duhet të merret më shumë me “rregullimin e vendit të tij të shkatërruar” dhe me çështjet e emigracionit dhe energjisë, sesa të ndërhyjë në politikën amerikane ndaj Iranit.
Megjithatë, Merz tha se pavarësisht kritikave, ai mbetet admirues i Amerikës.
“Jam një admirues i madh i Amerikës”, tha ai me ironi, përpara se të shtonte: “Por admirimi im nuk po rritet këto kohë”, deklaratë që u prit me të qeshura dhe duartrokitje nga publiku.
