Tensionet mes SHBA-ve dhe Iranit kanë tronditur sërish tregjet globale, duke çuar në një rritje të fortë të çmimeve të naftës, pasi Presidenti amerikan Donald Trump hodhi poshtë propozimin iranian për t’i dhënë fund luftës.
Në hapjen e tregjeve aziatike të hënën, nafta Brent u rrit me 3.1%, duke arritur në 104.50 dollarë për fuçi, ndërsa nafta amerikane u ngjit në 98.40 dollarë për fuçi.
Rritja e menjëhershme erdhi pasi Trump reagoi ashpër ndaj përgjigjes që Teherani kishte dërguar përmes Pakistanit, i cili po shërben si ndërmjetës mes dy vendeve.
Sipas mediave iraniane, Irani kërkoi ndalimin e menjëhershëm të luftës dhe garanci se SHBA-të dhe Izraeli nuk do të kryenin më sulme ndaj territorit iranian.
Por presidenti amerikan e refuzoi publikisht ofertën.
“Sapo lexova përgjigjen nga të ashtuquajturit ‘përfaqësues’ të Iranit. Nuk më pëlqen – PLOTËSISHT E PAPRANUESHME”, shkroi Trump në rrjetet sociale.
Sipas Axios, kushtet e Uashingtonit përfshijnë rikthimin e lëvizjes së lirë në Ngushticën e Hormuzit dhe ndalimin e pasurimit të uraniumit nga Irani.
Ndërkohë, kryeministri izraelit Benjamin Netanyahu deklaroi se lufta nuk mund të përfundojë pa u neutralizuar rezervat iraniane të uraniumit të pasuruar.
Ngushtica e Hormuzit, nga ku kalon rreth 20% e naftës dhe gazit të lëngshëm në botë, mbetet praktikisht e bllokuar që prej nisjes së luftës më 28 shkurt. Kriza ka goditur rëndë furnizimet globale me energji dhe ka shtuar frikën për një valë të re inflacioni në ekonominë botërore.
Analistët paralajmërojnë se nëse konflikti zgjatet dhe Hormuzi nuk rihapet, çmimi i naftës mund të shkojë shumë më lart në javët e ardhshme.
