Franca është vënë në gatishmëri pasi një nga pasagjerët e anijes turistike MV Hondius, e goditur nga shpërthimi i hantavirusit, shfaqi simptoma të sëmundjes gjatë kthimit me avion nga Tenerife drejt Parisit.
Lajmi u konfirmua nga kryeministri francez Sébastien Lecornu, i cili bëri të ditur se të pesë shtetasit francezë të evakuuar nga anija janë vendosur menjëherë në izolim të rreptë.
Sipas autoriteteve franceze, pasagjeri filloi të shfaqte simptoma gjatë fluturimit çarter që transportonte turistët nga Ishujt Kanarie drejt Francës.
Pamjet nga aeroporti Le Bourget në Paris treguan ekipe mjekësore të veshura me pajisje të plota mbrojtëse që prisnin avionin në pistë, ndërsa pasagjerët u transferuan me ambulanca drejt spitalit Bichat.
Atje, ata do të qëndrojnë në karantinë për të paktën 72 orë dhe do t’i nënshtrohen kontrolleve të detajuara mjekësore. Më pas, sipas Ministrisë së Jashtme franceze, do të vetëizolohen për 45 ditë.
Simptomat përfshijnë temperaturë, lodhje të fortë, dhimbje muskujsh, probleme gastrointestinale dhe vështirësi në frymëmarrje.
Vdekja e parë në lidhje me shpërthimin u regjistrua më 11 prill, ndërsa viktima e dytë humbi jetën më 2 maj. Një tjetër pasagjere, një grua holandeze 69-vjeçare që kishte zbritur nga anija në Shën Helena, vdiq më vonë në Afrikën e Jugut.
Ndërkohë, autoritetet shëndetësore europiane vazhdojnë gjurmimin e dhjetëra pasagjerëve që u larguan nga anija përpara vendosjes së masave të izolimit, në një përpjekje për të shmangur çdo përhapje të mëtejshme të virusit.
