Liderët e NATO-s riafirmuan këtë të mërkurë angazhimin e tyre të palëkundur për mbrojtjen kolektive dhe unitetin e aleancës, duke deklaruar se “një sulm ndaj njërit është sulm ndaj të gjithëve”, në deklaratën përfundimtare të miratuar gjatë samitit të zhvilluar në Ankara.
Në Deklaratën e Samitit të Ankarasë, aleatët ritheksuan përkushtimin ndaj Nenit 5 të Traktatit të Uashingtonit, lidhjes transatlantike dhe qasjes 360-gradëshe ndaj parandalimit dhe mbrojtjes. Dokumenti e përshkruan unitetin, solidaritetin dhe forcën kolektive si themelet e paqes, sigurisë dhe prosperitetit për rreth një miliard qytetarë të vendeve anëtare.
Në deklaratë, Rusia cilësohet si një kërcënim afatgjatë për sigurinë euroatlantike, ndërsa terrorizmi mbetet një sfidë e vazhdueshme.
NATO njofton se vendet evropiane anëtare dhe Kanadaja kanë rritur gjatë vitit të kaluar investimet në mbrojtje me mbi 139 miliardë dollarë.
Liderët shpallën gjithashtu mbi 50 miliardë dollarë prokurime të reja ushtarake, duke u angazhuar për rritjen e kapaciteteve të prodhimit të industrisë së mbrojtjes, përshpejtimin e inovacionit dhe heqjen e pengesave tregtare në sektorin e mbrojtjes mes vendeve aleate.
Deklarata parashikon investime të mëtejshme në teknologji dhe aftësi të avancuara ushtarake, përfshirë sistemet e goditjeve me precizion të lartë, mbrojtjen ajrore dhe raketore të integruar, sistemet pa pilot, inteligjencën, kapacitetet hapësinore dhe kibernetike, si dhe zhvillimin e një infrastrukture të përbashkët transatlantike për operacionet ushtarake dhe përdorimin e modeleve të inteligjencës artificiale.
Sa i përket Ukrainës, NATO riafirmoi mbështetjen e palëkundur për lirinë, sovranitetin dhe integritetin territorial të saj. Aleatët u angazhuan të ofrojnë gjatë vitit 2026 rreth 70 miliardë euro ndihmë ushtarake, pajisje dhe trajnime, ndërsa u zotuan të ruajnë të paktën të njëjtin nivel mbështetjeje edhe gjatë vitit 2027. Deklarata mirëpriti gjithashtu programin shumëvjeçar të huasë së Bashkimit Evropian për Ukrainën.
Në fund të deklaratës, vendet anëtare ritheksuan se Irani nuk duhet të zotërojë kurrë armë bërthamore dhe i kërkuan Teheranit të respektojë plotësisht lirinë e lundrimit në Ngushticën e Hormuzit.
Burimi: AA
