Një nënë britanike thotë se vendimi për të kufizuar pothuajse plotësisht kohën para ekraneve për djalin e saj 4-vjeçar ka sjellë ndryshime të mëdha në sjelljen dhe zhvillimin e tij.
Jade, 37 vjeçe nga Suffolk, vendosi që djali i saj Reggie të mos përdorte televizor, tablet apo telefon gjatë një pushimi familjar në muajin shkurt. Eksperimenti ishte planifikuar të zgjaste vetëm një javë, por tashmë kanë kaluar gati gjashtë muaj.
“Ka qenë një ndryshim i jashtëzakonshëm. Ka ndryshuar sjellja e tij, mënyra si komunikon dhe kreativiteti i tij,” tregon ajo.
Sipas saj, djali tani flet shumë më tepër, përdor një fjalor më të pasur dhe kalon orë të tëra duke shpikur lojëra, duke lexuar ose duke luajtur në kopsht.
“Kur fëmijët janë para ekranit nuk flasin. Kur luajmë bashkë, ne bisedojmë gjatë gjithë kohës. Pikërisht aty kam parë ndryshimin më të madh,” shprehet Jade.
Ajo pranon se ndonjëherë është më e vështirë, sidomos kur është e zënë me punët e shtëpisë, por beson se përfitimet janë shumë më të mëdha sesa lehtësia që ofron televizori.
“Në afat të gjatë është më e lehtë, sepse nuk krijohet ajo varësia nga stimulimi i menjëhershëm që ofrojnë ekranet,” thotë ajo.
Megjithatë, Jade thekson se nuk është kundër përdorimit të teknologjisë. Reggie sheh ndonjë film ose një episod të serialit të tij të preferuar “The Mandalorian”, por kjo ndodh rrallë, rreth një herë në muaj.
“Nuk po them se prindërit që i lejojnë fëmijët të shohin televizor bëjnë diçka të gabuar. Thjesht për ne nuk ka qenë më e nevojshme,” shton ajo.
Historia e saj vjen pasi qeveria britanike publikoi udhëzime të reja për përdorimin e ekraneve nga fëmijët nën pesë vjeç. Sipas tyre, pothuajse një në katër prindër e ka të vështirë të kontrollojë kohën që fëmijët e vegjël kalojnë para ekranit.
Ndërkohë, një raport i publikuar nga Ofcom tregon se 88% e fëmijëve nga 3 deri në 7 vjeç dhe pothuajse të gjithë fëmijët mbi 8 vjeç përdorin internetin. Ekspertët rekomandojnë që ekranet të përdoren me masë, duke u lënë fëmijëve më shumë kohë për lojë, lexim dhe aktivitete që nxisin imagjinatën dhe zhvillimin e aftësive sociale.
Burimi: BBC
