Netflix po përgatitet për një gjysmën e dytë të vitit 2026 me një ofensivë të madhe produksionesh, rikthime serialesh të famshme dhe transmetime sportive LIVE, në atë që konsiderohet një nga kalendarët më ambiciozë të platformës deri më sot.
Platforma amerikane do të sjellë gjatë muajve në vijim rikthimin e disa prej titujve më të ndjekur globalisht, mes tyre “Avatar: The Last Airbender” sezoni i dytë, “Enola Holmes 3” me Millie Bobby Brown dhe “The Gentlemen” sezoni i dytë.
Në qendër të strategjisë së Netflix këtë vit është edhe zgjerimi agresiv në transmetimet sportive LIVE. Programi përfshin ndeshje të NFL në Krishtlindje, evente speciale të MLB-së dhe rikthimin e shumëpritur në ring të Floyd Mayweather Jr. kundër Manny Pacquiao II.
Platforma po investon fort edhe në prodhime ndërkombëtare, me seriale koreane, thrillerë spanjollë, dokumentarë sportivë dhe animacione të mëdha. Mes projekteve më të komentuara janë “The Whisper Man” me Robert De Niro, “In the Hand of Dante” me Oscar Isaac dhe Jason Momoa, si dhe sezoni i dytë i “One Hundred Years of Solitude”.
Muaji qershor hapet me rikthimin e “Sweet Magnolias”, serialit fantastik “Avatar: The Last Airbender”, dokumentarë sportivë për Kupën e Botës dhe prodhime të reja nga Koreja, Japonia, Turqia dhe Amerika Latine. Në korrik pritet “Enola Holmes 3”, finalja speciale e “Heartstopper” dhe sezoni i dytë i “Ransom Canyon”.
Ndërkohë, Netflix po përgatit edhe lamtumirat e disa serialeve të njohur si “The Witcher”, “Heartstopper” dhe “The Empress”, të cilët do të mbyllen gjatë këtij viti.
Me këtë kalendar të ri, Netflix duket se po tenton të forcojë dominimin global jo vetëm në seriale dhe filma, por edhe në sport, dokumentarë dhe evente LIVE, në një kohë kur konkurrenca mes platformave streaming është bërë më agresive se kurrë.
