Stafi i një dyqani pijesh alkoolike në Virxhinia u trondit të shtunën në mëngjes, kur gjetën një “vizitor” të pazakontë: një rakun të dehur, të shtrirë pavetëdije në dyshemenë e banjës, pas një “feste” me alkool.
Sipas punonjësve të dyqanit, rakuni kishte hyrë në repartin e pijeve, duke përmbysur shishe dhe duke shijuar alkool nga ato që ishin në raftin e poshtëm. “Banditi i maskuar”, siç e quajtën me humor, u gjet i shtrirë midis tualetit dhe koshit të mbeturinave.
Oficerja e kontrollit të kafshëve, Samantha Martin, e mori “të dyshuarin” dhe e dërgoi në Strehën dhe Mbrojtjen e Kafshëve të Qarkut Hanover — natyrisht, pasi ai pati kohë të qetësohej nga dehja. Pas disa orësh gjumë dhe pa asnjë shenjë lëndimi, rakuni u lirua shëndoshë e mirë përsëri në natyrë.
Dyqani Ashland ABC ishte mbyllur për Ditën e Falënderimeve, kur ndodhi “vjedhja e së Premtes së Zezë”. Kur stafi u kthye në punë, gjeti shishe të thyera dhe pije të derdhura kudo në dysheme — përfshirë edhe uiskin skocez, që duket se ishte pija e preferuar e rakunit.
Oficerja Martin tha se kafsha kishte rënë përmes një pllake të tavanit para se të “bënte një shkatërrim të vërtetë, duke pirë gjithçka që gjente”. Nga kamerat e sigurisë është kapur vetëm një imazh i turbullt, ndaj nuk dihet saktësisht se sa alkool konsumoi “grabitësi me maskë” para se të binte pa ndjenja.
Dyqani falënderoi Mbrojtjen dhe Strehën e Kafshëve të Qarkut Hanover për ndërhyrjen profesionale dhe që i siguruan rakunit “një udhëtim për në shtëpi pa alkool”.
Oficerja Martin e mori ngjarjen me sportivitet: “Thjesht një ditë normale në jetën e një oficeri të kontrollit të kafshëve,” u shpreh ajo.
(Burimi: BBC)
