Shtëpia e Bardhë do të zhvillojë një rishikim të plotë të masave të sigurisë për Presidentin Donald Trump, pas incidentit me të shtëna gjatë Darkës së Korrespondentëve në Uashington, një ngjarje që ngriti shqetësime serioze për mbrojtjen në evente të profilit të lartë.
Sipas një zyrtari të lartë, një takim i posaçëm do të mbahet këtë javë nën drejtimin e shefes së stafit, Susie Wiles, ku do të marrin pjesë përfaqësues të Shërbimit Sekret dhe Departamentit të Sigurisë Kombëtare. Qëllimi është analizimi i protokolleve ekzistuese dhe identifikimi i masave shtesë për të parandaluar incidente të ngjashme në të ardhmen.
Ngjarja e së shtunës ndodhi kur një i dyshuar i armatosur, 31-vjeçari Cole Tomas Allen, arriti t’i afrohej zonës së sallës së vallëzimit në hotelin Washington Hilton, ku ndodheshin mbi 2,000 persona, përfshirë presidentin dhe anëtarë të kabinetit. Ai u neutralizua nga forcat e sigurisë pranë hyrjes së sallës, por gjatë përplasjes një agjent federal mbeti i plagosur, megjithëse jeleku antiplumb i shpëtoi jetën dhe ai pritet të rikuperohet plotësisht.
Pavarësisht incidentit, Trump ka shprehur mbështetje për Shërbimin Sekret, duke vlerësuar reagimin e tyre si profesional dhe efektiv në neutralizimin e kërcënimit dhe evakuimin e tij në një zonë të sigurt. Edhe zëdhënësja e Shtëpisë së Bardhë, Karoline Leavitt, theksoi se “ata bënë punën e tyre”, por nuk përjashtoi ndryshime në procedurat e sigurisë, të cilat nuk do të bëhen publike për arsye sigurie.
Ngjarja ka marrë edhe më shumë peshë pasi konsiderohet tentativa e tretë e dyshuar për atentat ndaj Trump brenda dy viteve. Presidenti pritet të marrë pjesë në një sërë eventesh të rëndësishme në muajt në vijim, përfshirë aktivitete të lidhura me Kupën e Botës FIFA dhe festimet për 250-vjetorin e SHBA-së.
Nga ana tjetër, detaje të reja mbi organizimin e sigurisë në darkë kanë nxitur debat. Të ftuarve nuk u kërkohej identifikim në hyrje dhe kontrolli me detektorë metalesh u krye vetëm një herë, një kat mbi sallën kryesore. Për më tepër, eventi nuk ishte klasifikuar si “Ngjarje e Sigurisë Speciale Kombëtare”, çka do të kishte sjellë masa më të forta mbrojtjeje.
Megjithatë, autoritetet mbrojnë faktin se sistemi funksionoi. Senatori Chuck Grassley, pas një informimi me drejtuesit e sigurisë, deklaroi se nuk pa prova për dështime të mëdha në protokoll, duke e cilësuar planin si “të mirë dhe të testuar në kohë”.
Shërbimi Sekret, në një reagim zyrtar, pranoi se megjithëse reagimi ishte efektiv, çdo incident i tillë shërben si një mësim për përmirësim. “Çdo vendim mbrojtës merret në një mjedis kërcënimi të lartë dhe dinamik”, u shpreh zëdhënësi Anthony Guglielmi, duke shtuar se hetimet për shkaqet e incidentit janë ende në vijim.
Ndërkohë, vetë Trump e pranoi rrezikun që mbartin këto aktivitete, duke deklaruar se “vështirë të imagjinohet një profesion më i rrezikshëm”, por theksoi se nuk do të lejojë që dhuna të ndryshojë mënyrën e jetesës amerikane.
