Autoritetet britanike po përpiqen të ndalojnë përfshirjen e adoleshentëve në krimin kibernetik përmes një programi të veçantë rehabilitimi, i cili synon t’i orientojë talentet e rinj drejt karrierave të ligjshme në fushën e sigurisë kibernetike.
Programi Cyber Choices, i drejtuar nga Agjencia Kombëtare e Krimit (NCA) dhe policia britanike, identifikon të rinjtë që kanë shfaqur aftësi në hakimin e sistemeve kompjuterike dhe u ofron këshillim, trajnim dhe mbështetje për t’i përdorur njohuritë e tyre në mënyrë të ligjshme.
Një prej tyre është Lucas, i cili në moshën 16-vjeçare arriti të depërtonte dy herë në sistemin informatik të shkollës së tij për të hyrë në faqet e bllokuara dhe për të luajtur lojëra. Në vend që të përballej menjëherë me pasoja penale, ai u përfshi në program, ku një oficer policie e ndihmoi të kuptonte kufirin mes kuriozitetit teknik dhe krimit.
Sipas autoriteteve britanike, shumë prej këtyre të rinjve nuk e nisin rrugën si kriminelë. Ata fillimisht eksperimentojnë me teknologjinë, testojnë sistemet ose përpiqen të anashkalojnë kufizimet, por më pas bien në kontakt me komunitete online ku hakimi dhe sulmet kibernetike inkurajohen.
Në tetë vitet e fundit, mbi 1.150 persona janë referuar në programin Cyber Choices, ndërsa pothuajse 600 raste janë regjistruar vetëm gjatë tre viteve të fundit, një tregues i rritjes së fenomenit.
Agjencia Kombëtare e Krimit paralajmëron se adoleshentët anglishtfolës po luajnë një rol gjithnjë e më të madh në sulmet kibernetike ndaj institucioneve dhe kompanive të mëdha. Në vitet e fundit, grupe të rinjsh janë lidhur me sulme ndaj Transport for London (TfL), zinxhirit Marks & Spencer, Co-op dhe kompanisë amerikane MGM Grand.
Policia thekson se shumica e të rinjve që përfshihen në këto raste janë djem dhe një pjesë e madhe e tyre janë me çrregullime të spektrit autik ose forma të tjera të neurodiversitetit. Sipas oficerëve të programit, këta të rinj shpesh kanë aftësi të jashtëzakonshme në teknologji, por nuk arrijnë të kuptojnë plotësisht pasojat ligjore të veprimeve të tyre.
Megjithatë, jo të gjithë pranojnë ndihmën. Njëri nga autorët e sulmit kibernetik ndaj rrjetit të transportit të Londrës kishte refuzuar më herët të merrte pjesë në program dhe më pas u dënua me burg.
Autoritetet britanike pranojnë se ekziston rreziku që disa të rinj të vazhdojnë aktivitetin kriminal edhe pasi janë përfshirë në program, por besojnë se alternativa – t’i lënë pa orientim – do të ishte shumë më e rrezikshme. Sipas tyre, qëllimi është që talenti i tyre të mos përfundojë në shërbim të krimit, por të kthehet në një profesion të vlefshëm në mbrojtje të sistemeve dixhitale.
