Mel Gibson ka zbuluar pamjen e parë të filmit të shumëpritur “The Resurrection of the Christ”, vazhdimi i “The Passion of the Christ”, ndërsa studioja Lionsgate ka njoftuar edhe shtyrjen e datës së publikimit.
Në foton e parë zyrtare shfaqet aktori finlandez Jaakko Ohtonen në rolin e Jezus Krishtit, duke zëvendësuar Jim Caviezel, i cili interpretoi figurën ikonike në filmin origjinal të vitit 2004.
Pjesa e parë e “The Resurrection of the Christ” do të dalë tashmë më 6 maj 2027, disa muaj më vonë nga data fillestare e planifikuar. Ndërkohë, pjesa e dytë është shtyrë për më 25 maj 2028.
Filmi origjinal “The Passion of the Christ” u kthye në një fenomen global, duke gjeneruar mbi 610 milionë dollarë në mbarë botën dhe mbetet ende filmi independent me fitimet më të larta në histori.
Në kastin e ri bëjnë pjesë edhe Mariela Garriga, Pier Luigi Pasino, Kasia Smutniak, Riccardo Scamarcio dhe Rupert Everett.
Mel Gibson deklaroi se projekti ka një rëndësi shumë personale për të.
“Ky është shumë më tepër sesa një film për mua. Është një mision që e kam mbajtur për më shumë se 20 vite, për të treguar atë që besoj se është historia më e rëndësishme në historinë njerëzore”, tha regjisori.
Produksioni i filmit sapo ka përfunduar xhirimet dhe pritet të jetë një nga projektet më të mëdha kinematografike të viteve të ardhshme.
(Burimi: The Hollywood Reporter)
