Këngëtarja shqiptare me famë ndërkombëtare, Rita Ora, ka zbuluar zyrtarisht datat e turneut të saj veror për vitin 2026, duke konfirmuar një sërë koncertesh dhe pjesëmarrjesh në festivale të njohura në vende të ndryshme të botës.
Artistja ndau kalendarin e saj veror me miliona ndjekës në rrjetet sociale, duke shprehur entuziazmin për sezonin që e pret. “Summer 2026, I’m so ready for you”, shkroi ajo, duke paralajmëruar një verë të mbushur me performanca dhe takime me fansat.
Një lajm që ka ngjallur interes të veçantë mes publikut shqiptar është konfirmimi i koncertit të saj në Ohër. Rita Ora do të ngjitet në skenë më 1 gusht në kuadër të Ohrid Summer Festival, në atë që pritet të jetë një nga ngjarjet më të rëndësishme muzikore të sezonit në rajon.
Për fansat nga Kosova, Shqipëria dhe vendet fqinje, koncerti në Ohër përfaqëson një mundësi të rrallë për ta ndjekur nga afër yllin shqiptar, pa qenë nevoja të udhëtojnë drejt destinacioneve më të largëta evropiane ku ajo performon rregullisht.
Sipas organizatorëve, koncerti do të zhvillohet në stadiumin “Biljanini Izvori” dhe pritet të mbledhë mijëra spektatorë. Ata e kanë cilësuar Rita Orën si një nga figurat më të spikatura të muzikës pop bashkëkohore, me miliarda dëgjime në platformat muzikore, një sërë hitesh ndërkombëtare dhe paraqitje në skenat më prestigjioze të botës.
“Një ikonë globale e muzikës dhe modës, një artiste me miliarda dëgjime, vlerësime ndërkombëtare dhe koncerte në skenat më të mëdha të botës. Këtë verë, ajo zgjodhi Ohrin”, kanë deklaruar organizatorët, duke e cilësuar koncertin si një nga pikat kulmore të programit veror.
Paraqitja në Ohër është pjesë e një serie koncertesh dhe festivalesh ndërkombëtare ku Rita Ora do të performojë gjatë vitit 2026, duke dëshmuar edhe një herë pozicionin e saj si një nga artistet shqiptare më të suksesshme dhe më të njohura në arenën globale.
