Kuvendi mblidhet këtë të enjte në një seancë plenare ku pesha kryesore bie mbi përballjen politike përmes interpelancave dhe një seri marrëveshjesh për miratim, ndërsa në fund pritet edhe një vendim për drejtimin e Autoritetit të Konkurrencës.
Sipas rendit të ditës, seanca hapet me katër interpelanca, që përfshijnë Ministrin e Mbrojtjes, Ministren e Arsimit, Kryeministrin dhe Zëvendëskryeministren. Këto pritet të jenë momentet më të forta të debatit politik, me opozitën që mё nё fund ka filluar tё kërkojё llogari për çështje të ndryshme të qeverisjes.
Pas përplasjes politike, seanca kalon në një axhendë më teknike, ku dominojnë marrëveshjet ndërkombëtare dhe projektligjet. Deputetët do të shqyrtojnë disa ratifikime që lidhen me financimin, energjinë, bashkëpunimin me Gjermaninë për projektin “Green Vjosa”, si dhe aderimin në marrëveshje ndërkombëtare për menaxhimin e burimeve detare. Në të njëjtën linjë, pritet të miratohen edhe ndryshime në ligjin për Gardën e Republikës.
Në fund të rendit të ditës, vjen edhe një nga vendimet kryesore të seancës: zgjedhja e Kryetarit të Komisionit të Autoritetit të Konkurrencës.
Sipas raportit të Komisionit për Ekonominë, gara ka pёrfunduar me vetëm një kandidaturë – ajo e Denar Bibës – e cila i është paraqitur Kuvendit për miratim. Duke qenë kandidatura e vetme, votimi pritet të jetë formal dhe Biba tё konfirmohet pёr herё tё dytё nё krye tё Autoritetit.
