Administrata Amerikane e Ushqimit dhe Barnave (FDA) ka miratuar për herë të parë një ilaç kundër dhimbjes që mund të blihet pa recetë, i cili kombinon Tylenol (paracetamol) me naproksenin, duke ofruar lehtësim të dhimbjeve deri në 12 orë.
Tableta e re është miratuar për përdorim tek të rriturit dhe fëmijët mbi 12 vjeç dhe mund të përdoret për trajtimin e dhimbjeve të kokës, shpinës, muskujve, dhimbjeve të dhëmbëve, dhimbjeve menstruale, si edhe dhimbjeve të lehta nga artriti.
Sipas FDA-së, çdo tabletë përmban 325 miligramë paracetamol (Tylenol) dhe 110 miligramë naproksen natriumi, një ilaç anti-inflamator jo steroid (NSAID). Kombinimi synon të ofrojë një efekt më të gjatë dhe më të fuqishëm kundër dhimbjes sesa përdorimi i secilit përbërës veçmas.
Autoriteti amerikan tha se miratimi është në përputhje me planin e administratës Trump për të zgjeruar aksesin e qytetarëve në barna të sigurta dhe të verifikuara që mund të blihen pa recetë.
Ndërkohë, Tylenol vazhdon të jetë objekt debatesh në SHBA për shkak të pretendimeve se përdorimi i tij gjatë shtatzënisë mund të lidhet me rritjen e rrezikut për autizëm tek fëmijët. Megjithatë, autoritetet shëndetësore theksojnë se deri më sot nuk ka prova të forta shkencore që konfirmojnë një lidhje të tillë.
Çështja ka shkaktuar edhe procese gjyqësore. Shteti i Teksasit ka paditur kompaninë Kenvue, duke e akuzuar se nuk ka paralajmëruar mjaftueshëm gratë shtatzëna për rreziqet e mundshme, ndërsa një gjykatë federale e apelit ka lejuar të vazhdojnë mbi 500 padi të ngjashme të ngritura nga qytetarë.
Kenvue, kompania që zotëron markën Tylenol, pritet të blihet gjatë këtij viti nga gjiganti amerikan Kimberly-Clark, në një marrëveshje me vlerë mbi 40 miliardë dollarë.
