Donald Trump deklaroi se Shtetet e Bashkuara nuk do ta heqin bllokadën ndaj porteve iraniane derisa të arrihet një marrëveshje me Iranin, në një moment kur tensionet mbeten të larta dhe e ardhmja e bisedimeve për paqe është e paqartë.
Në një postim në platformën Truth Social, Trump tha se bllokada – e nisur një javë më parë – po “shkatërron absolutisht Iranin”, duke shtuar se SHBA-të po e fitojnë konfliktin “me shumë diferencë”.
Këto komente vijnë ndërsa një armëpushim i përkohshëm mes SHBA-së dhe Iranit pritet të përfundojë të mërkurën, pa siguri nëse do të zhvillohet një raund i dytë bisedimesh për paqe në Islamabad. Në kryeqytetin pakistanez janë shtuar masat e sigurisë në pritje të një takimi të mundshëm, megjithatë zëvendëspresidenti amerikan JD Vance nuk është nisur ende nga Uashingtoni, ndërsa Teherani nuk ka vendosur nëse do të marrë pjesë.
Sipas United States Central Command (Centcom), që nga fillimi i bllokadës forcat amerikane kanë detyruar 27 anije të kthehen në porte iraniane. Po ashtu, për herë të parë gjatë këtij konflikti, SHBA-të kanë ndaluar dhe sekuestruar një anije mallrash me flamur iranian, pasi ajo tentoi të kalonte bllokadën. Autoritetet amerikane publikuan pamje ku anija paralajmërohet përpara se të zmbrapset.
Teherani e cilësoi këtë veprim si “akt piraterie” dhe shkelje të armëpushimit të brishtë mes dy vendeve.
Nga ana tjetër, Irani ka mbajtur për gati dy muaj të mbyllur Hormuzin, një nga rrugët detare më të rëndësishme për tregtinë globale të energjisë, duke ndikuar në rritjen e çmimeve në tregjet ndërkombëtare. Edhe pse u rihap përkohësisht të shtunën, ngushtica u mbyll sërish pas raportimeve për anije që u vunë në shënjestër.
Trump akuzoi Iranin për shkelje të armëpushimit, duke thënë se kishte “zgjedhur të qëllonte me plumba”, ndërsa Irani këmbëngul se do ta mbajë të mbyllur ngushticën derisa SHBA-të të heqin bllokadën ndaj porteve të tij.
Ndërkohë, ka sinjale se një raund i dytë bisedimesh mund të zhvillohet, megjithëse pa konfirmim nga pala iraniane. Pas raundit të parë, Vance tha se SHBA-të nuk kishin arritur një marrëveshje sepse Irani nuk pranoi kushtet amerikane, ndërsa ministria e jashtme iraniane akuzoi Uashingtonin për “kërkesa të tepërta dhe të paligjshme”.
Delegacioni amerikan pritet të përfshijë edhe të dërguarin e posaçëm Steve Witkoff dhe këshilltarin Jared Kushner. Në Islamabad, hoteli ku u mbajt raundi i parë është zbrazur për përgatitjet, ndërsa rrugët kryesore janë mbyllur për shkak të masave të sigurisë.
Zyrtarë pakistanezë shprehen optimistë se mund të bindin Iranin të marrë pjesë në bisedime, duke theksuar se presioni diplomatik është në rritje dhe se “linjat telefonike janë në zjarr” për të siguruar praninë e të dyja palëve.
