Shtetet e Bashkuara njoftuan të shtunën në mbrëmje se kanë përfunduar raundin e tretë të sulmeve ushtarake kundër Iranit gjatë kësaj jave, pas një tjetër incidenti në Ngushticën e Hormuzit, ku Uashingtoni akuzon Teheranin për sulm ndaj një anijeje tregtare.
Sipas Komandës Qendrore të Ushtrisë Amerikane (CENTCOM), forcat amerikane goditën rreth 140 objektiva ushtarake iraniane duke përdorur municione me preçizion të lartë të lëshuara nga avionë luftarakë, dronë dhe mjete detare.
Objektivat e goditura përfshinin baza raketore dhe të dronëve, kapacitete detare, depo municionesh, rrjete komunikimi dhe pozicione të mbikëqyrjes bregdetare.
“Gjatë tre netëve të sulmeve të kësaj jave, CENTCOM ka goditur mbi 300 objektiva me urdhër të Komandantit të Përgjithshëm, për të dobësuar aftësinë e Iranit për të sulmuar marinarët civilë dhe anijet tregtare që lundrojnë lirshëm në Ngushticën e Hormuzit”, thuhet në deklaratën e komandës amerikane.
CENTCOM shtoi se, pavarësisht operacioneve ushtarake, trafiku tregtar në Ngushticën e Hormuzit vazhdon.
Sipas ushtrisë amerikane, që nga fillimi i muajit maj, forcat e SHBA-së kanë ndihmuar në kalimin e më shumë se 800 anijeve tregtare, të cilat transportonin rreth 400 milionë fuçi naftë përmes kësaj rruge strategjike.
Sulmet e fundit erdhën pasi SHBA pretendoi se Garda Revolucionare Islamike e Iranit (IRGC) sulmoi me raketë anijen tregtare M/V GFS Galaxy në Ngushticën e Hormuzit.
Uashingtoni deklaroi se nga sulmi u zhduk një anëtar civil i ekuipazhit dhe u shkaktuan dëme të konsiderueshme në anije.
Nga ana tjetër, Garda Revolucionare iraniane mohoi versionin amerikan, duke deklaruar se kishte qëlluar vetëm një “të shtënë paralajmëruese”, pasi anija nuk kishte ndryshuar kursin sipas kërkesës së autoriteteve iraniane.
Më pas, Irani njoftoi mbylljen e Ngushticës së Hormuzit “deri në një njoftim të dytë”, pasi bisedimet diplomatike të zhvilluara në Muskat për uljen e tensioneve nuk arritën të prodhonin një marrëveshje.
