Popullsia e Bashkimit Evropian vazhdoi të rritet edhe gjatë vitit 2025, duke arritur në 452 milionë banorë më 1 janar 2026, ose 706 mijë më shumë krahasuar me një vit më parë.
Sipas të dhënave të publikuara nga Eurostat, ky është viti i pestë radhazi me rritje të popullsisë, pas rënies së regjistruar në vitin 2021 gjatë pandemisë COVID-19.
Eurostat thekson se që prej vitit 2012, rritja e popullsisë në BE nuk vjen nga shtesa natyrore, pasi numri i vdekjeve vazhdon të jetë më i lartë se ai i lindjeve. Rritja është kompensuar nga emigracioni neto pozitiv, i cili mbetet faktori kryesor i shtimit të popullsisë.
Në krahasim me një dekadë më parë, Bashkimi Evropian ka 8 milionë banorë më shumë se në vitin 2016 dhe 16 milionë më shumë se në vitin 2006.
Në një perspektivë afatgjatë, popullsia e BE-së është rritur me 97.5 milionë banorë që nga viti 1960, kur numëronte 354.5 milionë banorë. Megjithatë, ritmi i kësaj rritjeje është ngadalësuar ndjeshëm. Në vitet 1960 popullsia shtohej mesatarisht me 3 milionë banorë në vit, ndërsa gjatë dekadës 2010 kjo mesatare zbriti në vetëm 600 mijë banorë në vit.
Gjermania mbetet vendi më i populluar i Bashkimit Evropian me 83.5 milionë banorë, ndërsa Malta është shteti me popullsinë më të vogël, me rreth 600 mijë banorë.
Pesë vendet më të mëdha – Gjermania, Franca, Italia, Spanja dhe Polonia – përbëjnë së bashku rreth dy të tretat e popullsisë së gjithë Bashkimit Evropian.
Gjatë periudhës 1 janar 2025 – 1 janar 2026, popullsia u rrit në 16 nga 27 vendet anëtare. Rritjen më të lartë e regjistroi Malta, e ndjekur nga Qipro dhe Luksemburgu.
Nga ana tjetër, rënien më të madhe të popullsisë e shënuan Letonia, Estonia dhe Hungaria.
Eurostat publikoi këto statistika në kuadër të Ditës Botërore të Popullsisë, e cila shënohet çdo vit më 11 korrik.
Burimi: Eurostat
