Prokuroria e Tiranës ka kërkuar një dënim prej 25 vitesh burg për Mario Përlleshajn, adoleshentin e akuzuar për vrasjen e 14-vjeçarit Martin Cani, një ngjarje që tronditi vendin një vit më parë pranë shkollës “Fan Noli” në kryeqytet.
Këtë javë, organi i akuzës paraqiti pretendimet përfundimtare, duke e akuzuar të miturin për vrasje dhe plagosje të një tjetër bashkëmoshatari. Sipas Kodit për të Mitur, edhe nëse gjykata pranon kërkesën e prokurorisë, dënimi maksimal që mund t’i jepet 14-vjeçarit është 12 vite burg në zbatim të nenit 97.
Seanca e radhës është caktuar më 27 nëntor, ku pritet që mbrojtja të paraqesë argumentet e saj përfundimtare.
Ngjarja tragjike ndodhi më 18 nëntor 2024, gjatë një konflikti mes adoleshentëve. Mario Përlleshaj goditi me thikë Martin Canin, i cili humbi jetën gjatë transportimit për në spital, ndërsa një shok i tij mbeti i plagosur. Krimi u konsiderua si një prej rasteve më të rënda të dhunës mes të miturve të regjistruar vitet e fundit.
