Një operacion i madh antidrogë në Sri Lanka ka çuar në arrestimin e 22 murgjve budistë, të cilët dyshohet se po transportonin mbi 110 kilogramë kanabis në aeroportin ndërkombëtar të kryeqytetit, Colombo. Autoritetet e përshkruajnë këtë si kapjen më të madhe të drogës të regjistruar ndonjëherë në këtë aeroport.
Sipas policisë, murgjtë po ktheheshin nga Tajlanda kur u ndaluan në Aeroportin Ndërkombëtar Bandaranaike. Çdo person mbante një valixhe me më shumë se 5 kilogramë kanabis, ndërsa droga ishte fshehur në mënyrë të sofistikuar brenda bagazheve, duke përdorur funde të rreme të modifikuara posaçërisht.
Operacioni u ndërmor pas një informacioni paraprak, ndërsa vlera e lëndës narkotike të sekuestruar llogaritet mbi 3.45 milionë dollarë (rreth 1.1 miliardë rupi), sipas burimeve zyrtare.
Autoritetet theksojnë se kjo është hera e parë që murgj budistë arrestohen në aeroport për trafik droge, një zhvillim që ka tronditur opinionin publik në vendin aziatik, ku figura e murgut gëzon respekt të lartë shoqëror.
Grupi, i përbërë nga të rinj nga zona të ndryshme të Sri Lankës, kishte udhëtuar drejt Tajlandës më 22 prill me bileta të siguruara nga një sponsor i paidentifikuar. Hetuesit po verifikojnë nëse rasti lidhet me rrjete të organizuara të trafikut të drogës brenda vendit.
Sri Lanka ka një nga legjislacionet më të ashpra në rajon për krimet e lidhura me drogën. Sipas autoriteteve, personat e arrestuar mund të mbahen për periudha të gjata pa akuza dhe, nëse shpallen fajtorë, përballen me dënime të rënda me burg.
Të arrestuarit pritet të dalin para Gjykatës, ndërsa hetimet për rastin vijojnë.
