Spanja po përgatitet të përballet me valën e tretë të të nxehtit këtë verë, ndërsa autoritetet meteorologjike paralajmërojnë se temperaturat në disa zona mund të kalojnë 45 gradë Celsius, duke rritur ndjeshëm edhe rrezikun e zjarreve.
Sipas Agjencisë Shtetërore të Meteorologjisë (Aemet), vala e të nxehtit pritet të nisë të martën dhe të zgjasë të paktën deri të enjten, kur parashikohet të arrijë kulmin.
Më të prekura do të jenë zonat juglindore të Gadishullit Iberik, ndërsa temperatura shumë të larta priten edhe në luginat e Guadalquivir dhe Ebro, në ultësirat verilindore, luginat e Pirenejve dhe në pjesën e brendshme të ishullit Majorka.
Meteorologët shpjegojnë se mbi pjesën më të madhe të Spanjës dhe Ishujt Balearikë do të vendoset një masë ajri shumë e nxehtë dhe e thatë, e shoqëruar edhe me pluhur në atmosferë.
Temperaturat do të rriten gradualisht gjatë fundjavës, ndërsa në fillim të javës së ardhshme pritet të arrijnë nivele shumë të larta. Të martën, termometri mund të shënojë 41–43°C në zonat e brendshme juglindore, ndërsa në disa pika temperaturat mund të kalojnë 44°C. Kushte të ngjashme parashikohen edhe të mërkurën.
Dita më kritike pritet të jetë e enjtja, kur temperaturat në juglindje mund të arrijnë 42–44°C, ndërsa në disa zona të izoluara të kalojnë edhe 45°C. Në luginën e Guadalquivir dhe pellgun e lumit Genil temperaturat mund të shkojnë deri në 43°C.
Aemet paralajmëron gjithashtu se rreziku për zjarre pyjore do të arrijë nivele ekstreme, ndërsa në zonat malore mund të zhvillohen stuhi të thata pasdite, të cilat mund të favorizojnë shpërthimin e vatrave të reja të zjarrit.
Megjithëse nga e premtja pritet një rënie graduale e temperaturave, meteorologët theksojnë se parashikimet mbeten të pasigurta dhe vala e të nxehtit mund të zgjasë edhe përtej kësaj date.
Kjo është vala e tretë e të nxehtit që godet Spanjën këtë verë, pas episodeve të regjistruara më 21–24 qershor dhe 5–9 korrik. Të dhënat e Aemet tregojnë se valët e të nxehtit janë bërë gjithnjë e më të shpeshta dhe po nisin më herët se në të kaluarën. Në Spanjën kontinentale u regjistruan vetëm dy valë të të nxehtit në muajin qershor gjatë periudhës 1975–2000, ndërsa nga viti 2000 deri në 2025 janë regjistruar 10 episode të tilla.
