Ecja e përditshme, qoftë edhe thjesht rruga për në shkollë, mund të lidhet me një shëndet mendor më të mirë te adoleshentët. Një studim me mbi 5,500 të rinj zbuloi se ata që bënin më shumë hapa gjatë ditës shfaqnin më pak simptoma ankthi, humori të ulët dhe probleme të sjelljes një vit më vonë.
Studimi, i drejtuar nga King’s College London në bashkëpunim me University of Massachusetts Amherst, përfshiu adoleshentë amerikanë me moshë mesatare 12 vjeç. Pjesëmarrësit mbajtën pajisje Fitbit për tre javë, ndërsa një vit më vonë studiuesit vlerësuan gjendjen e tyre të shëndetit mendor.
Rezultatet treguan një lidhje të qartë: të rinjtë që bënin më pak se 5,000 hapa në ditë kishin më shumë probleme të shëndetit mendor, simptomat ishin më të pakta tek ata që arrinin rreth 8,000 hapa, ndërsa nivelet më të ulëta u regjistruan tek adoleshentët që bënin 12,000 hapa ose më shumë në ditë.
Por studiuesit theksojnë se nuk ekziston një numër “magjik” hapash që duhet arritur. Përmirësime u vunë re edhe me vetëm 1,000 deri në 2,000 hapa shtesë në ditë, pavarësisht nivelit fillestar të aktivitetit. Këta hapa mund të shtohen përmes veprimeve të zakonshme, si ecja për në shkollë, vajtja në dyqane apo lojërat dhe aktivitetet fizike.
“Adoleshentët nuk kanë nevojë të jenë sportistë elitarë për të përfituar”, tha Dr. Amanda Paluch nga University of Massachusetts Amherst, duke theksuar se edhe rritje relativisht të vogla të aktivitetit të përditshëm lidheshin me rezultate më të mira për trurin dhe shëndetin mendor.
Të rinjtë që ecnin më shumë kishin gjithashtu një trashësi pak më të madhe të indit të trurit në dy zona që lidhen me lëvizjen dhe rregullimin e emocioneve. Këto ndryshime, nga ana tjetër, u shoqëruan me rezultate më të mira të shëndetit mendor në vazhdim.
Megjithatë, studiuesit sqarojnë se rezultatet tregojnë një lidhje dhe jo domosdoshmërisht shkak-pasojë. Pra, studimi nuk provon se vetëm shtimi i numrit të hapave është shkaku i drejtpërdrejtë i përmirësimit të shëndetit mendor. Gjithashtu, nuk u gjet ndonjë lidhje mes numrit të hapave dhe rezultateve të nxënësve në shkollë.
Megjithatë, nuk është e nevojshme që një adoleshent të kalojë menjëherë nga 5,000 në 10,000 apo 12,000 hapa. Edhe pak më shumë lëvizje çdo ditë mund të shoqërohet me përfitime, ndërsa brenda niveleve të aktivitetit të studiuara, përfitimet nuk dukeshin se ndalonin te një prag i caktuar.
