Dashnor Sula doli në terren si “Robokop”-i shpëtues. Ai na siguron se sistemi i ri me tableta do të rrisë efikasitetin dhe besimin publik në kontrollet e inspektoriateve të tij.
Pretendimi më i fundit “teknologjik” flet për pajisjen e inspektorëve të “Dashnorit” me tableta elektronike. Një tjetër episod i serialit të gjatë “Shteti Digjital – Sezoni Socialist”.
Sipas raportimit të BalkanWeb, janë shpërndarë 143 tableta për të mundësuar “monitorim në kohë reale”, “raportim elektronik” dhe – natyrisht – “transparencë”.
Një pretendim i admirueshëm, por aspak i verifikueshëm!
Nëse inspektorët me tabletë i kontrollon Dashi, kush i kontrollon të dhënat që prodhojnë këto tableta? Ku ruhen ato? Kush garanton integritetin e tyre?
Dhe pyetja që na lë si “dele” pa përgjigje është: kush mban përgjegjësi nëse “monitorimi në kohë reale” rezulton të jetë thjesht një ekran i fikur?
Debati i sotëm mbi provat digjitale, nuk është thjesht teknologjik, por procedural: a është sistemi i verifikueshëm dhe i kontrollueshëm?
Por këto janë detaje “të vogla: për një shtet që ka vendosur të modernizohet përmes “tabletave”, jo përmes institucioneve.
Një tabletë më shumë, një përgjigje më pak
Në teori, tabletat duhet të shmangin “mbivendosjet dhe përdorimin joefikas të burimeve”.
Po Shqipëria e “Dashnorёve” është një laborator i gjallë që provon të kundërtën: dixhitalizimi shpallet si zgjidhje, ndërsa administrata rritet dhe burokracia riciklohet në format PDF.
Paradoksi është real, jo digjital: kemi më shumë teknologji, kemi më shumë administratë, kemi thuajse aspak përgjegjësi.
Një tabletë për çdo inspektor, por asnjë “gjurmim auditi” për vendimmarrjen. Asnjë “Dashnor” që mban përgjegjësi për këtë.
Pajisjet e Dashit mund tё jenё moderne, retorika shumё futuriste, dhe sigurisht dyshimet për shpёrdorim tё fondeve publike – të vjetra sa vetë tranzicioni.
© Ky është artikull ekskluziv i KontrasT.al, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to” / Artikulli mund të ripublikohet vetёm i shoqëruar me linkun e artikullit origjinal.
