Pesë persona kanë humbur jetën dhe disa të tjerë kanë mbetur të plagosur pas një sulmi me armë zjarri që ndodhi të hënën në qytetin Stade, në landin e Saksonisë së Poshtme, në veri të Gjermanisë.
Sipas policisë gjermane, ngjarja ndodhi në një qendër të mirëqenies për të rinjtë, në rrugën Dankersstrasse, në jug të qendrës së qytetit.
Autoritetet konfirmuan se dy persona janë arrestuar, mes tyre edhe autori i dyshuar i sulmit. Roli i personit të dytë është ende nën hetim.
Policia bëri të ditur se nuk ka më persona të tjerë në arrati dhe se nuk ekziston rrezik për qytetarët.
Deri më tani nuk janë bërë publike identitetet e viktimave, ndërsa autoritetet nuk kanë dhënë ende një bilanc të saktë të të plagosurve.
Shkaqet dhe motivi i sulmit mbeten të paqarta. Hetuesit po punojnë për të zbardhur dinamikën e plotë të ngjarjes dhe rrethanat që çuan në të shtënat.
Mediat lokale raportojnë se incidenti ndodhi në një qendër rinore në qytetin Stade, i cili ndodhet rreth 45 kilometra në perëndim të Hamburgut dhe ka afro 50 mijë banorë.
Policia vijon hetimet, ndërsa pritet që në orët në vijim të publikohen më shumë detaje mbi autorët, viktimat dhe motivin e sulmit.
