Të paktën gjashtë nxënës u vranë dhe 17 të tjerë u plagosën pas të shtënave me armë në një shkollë të mesme në jug të Filipineve.
Ngjarja ndodhi të premten në Banga National High School, në provincën South Cotabato. Sipas raportimeve të mediave vendase, autori i dyshuar ishte gjithashtu nxënës i shkollës dhe ndodhet mes viktimave.
Pas sulmit, autoritetet pezulluan menjëherë mësimin në të gjitha shkollat e qytetit Banga, ndërsa policia ka nisur hetimet për të përcaktuar rrethanat dhe motivin, i cili deri tani nuk është bërë i ditur.
Departamenti i Arsimit deklaroi se përparësi mbetet siguria e nxënësve, mësuesve dhe personelit, ndërsa të prekurve do t’u ofrohet mbështetje psikologjike.
Ngjarja vjen vetëm një muaj pas një tjetër sulmi me armë në Ateneo de Zamboanga University, ku më 18 gusht humbën jetën dy studentë, përfshirë edhe autorin e sulmit.
