Presidenti i SHBA-së, Donald Trump, ka paralajmëruar Kinën dhe Rusinë që të mos furnizojnë Iranin me armë, duke deklaruar se një veprim i tillë “do të ishte shumë i keq” për të dyja vendet.
Në një postim në rrjetin social Truth Social, Trump tha se beson se as Pekini dhe as Moska nuk po marrin pjesë në mbështetjen ushtarake të Iranit dhe se të dy liderët i kanë dhënë garanci personale për këtë çështje.
Sipas Trump, gjatë takimit të fundit në Pekin, presidenti kinez Xi Jinping i ka premtuar se Kina “në asnjë rrethanë” nuk do t’i japë apo shesë armë Republikës Islamike të Iranit, përfshirë edhe përmes kompanive kineze.
“Duke marrë parasysh marrëdhënien tonë, e besoj fjalën e tij. Përveç kësaj, unë po i bëj atij favore shumë të mëdha”, shkroi Trump.
Presidenti amerikan tha se një garanci të ngjashme ka marrë edhe nga presidenti rus Vladimir Putin, pavarësisht luftës së vazhdueshme në Ukrainë.
“Putin më tha se Rusia nuk do t’i shesë armë Iranit. Ai e kupton se unë nuk i shes armë Ukrainës, por vendeve të NATO-s. Ato paguajnë çmimin e plotë dhe mënyra se si shpërndahen më pas armët nuk është përgjegjësia ime”, u shpreh Trump.
Në përfundim, kreu i Shtëpisë së Bardhë theksoi se Kina dhe Rusia janë dy vendet që përmenden më shpesh si mbështetëse të mundshme të Iranit, por sipas tij ato nuk janë duke u përfshirë në konflikt.
“Nëse do ta bënin, do të ishte shumë keq për ta. Sigurisht që nuk do të ishte në interesin e tyre më të mirë”, paralajmëroi Trump.
