Një avokat britanik është përjashtuar nga regjistri profesional pasi përdori inteligjencën artificiale për të përgatitur mbrojtjen e tij në një procedim disiplinor dhe paraqiti përpara autoriteteve juridike jurisprudencë të rreme ose të pasaktë.
Abhishek Kumar, avokat i huaj i regjistruar në Angli dhe Uells që prej vitit 2018, ishte referuar për procedim disiplinor pas dënimit të tij penal për punësimin me vetëdije të një personi që nuk kishte të drejtë ligjore të punonte në Mbretërinë e Bashkuar. Në vitin 2024, ai ishte dënuar me një vendim për detyrimin e kryerjes punë me interes publik 12-mujor dhe 150 orë punë të papaguar.
Kur u përball me procedimin disiplinor, Kumar përdori inteligjencën artificiale për të hartuar përgjigjen e tij. Rezultati përmbante referenca të pasakta, citime që i përkisnin çështjeve të tjera dhe autoritete që nuk mbështesnin argumentet e paraqitura. Pasi autoriteti rregullator ia vuri në dukje gabimet, ai përdori sërish AI për të hartuar shpjegimin – duke prodhuar edhe më shumë pasaktësi.
Para gjykatës, Kumar argumentoi se nuk kishte pasur qëllim të mashtronte dhe se problemet buronin nga paaftësia dhe gjykimi i dobët, duke pretenduar gjithashtu se nuk kishte ekspertizën e nevojshme për të verifikuar materialin e gjeneruar nga AI.
Gjykata nuk e pranoi këtë justifikim. Sipas tij, një profesionist i rregulluar ligjërisht mbetet personalisht përgjegjës për saktësinë dhe besueshmërinë e materialit që paraqet, pavarësisht nëse ai është hartuar nga vetë avokati apo është prodhuar me ndihmën e një sistemi të inteligjencës artificiale. Përdorimi i AI “pa menduar siç duhet për pasojat” dhe dështimi i përsëritur për të verifikuar rezultatet u konsideruan me përgjegjësi shumë të lartë dhe me pasoja serioze për administrimin e drejtësisë dhe besimin e publikut te profesioni juridik.
Përfundimi ishte i prerë: Kumar u përjashtua nga regjistri i avokatëve të huaj. Tribunali vlerësoi se edhe dënimi penal, edhe keqpërdorimi i AI-së, do të mjaftonin veçmas për një masë të tillë.
Mësimi është më i madh se vetë rasti
Ky rast nuk tregon se inteligjenca artificiale nuk duhet përdorur në profesionin juridik. Tregon diçka shumë më themelore: AI mund të ndihmojë avokatin, por nuk mund të marrë përsipër përgjegjësinë profesionale të tij.
Një algoritëm mund të prodhojë një tekst që duket juridikisht bindës, të citojë një gjykatë që nuk ka ekzistuar kurrë dhe të shpikë një precedent me emër, datë dhe formulime jashtëzakonisht të besueshme. Por përgjegjësia për ta kontrolluar atë material përpara se të depozitohet në një gjykatë mbetet njerëzore.
