Një burrë 32-vjeçar, i dënuar më parë për dhunë në familje dhe që mbahej nën mbikëqyrje me një pajisje elektronike në kyçin e këmbës, është arrestuar dhe akuzuar për vrasjen e Sonia Bellinas, një influencere franceze 29-vjeçare, trupi i së cilës u gjet i dhunuar dhe pjesërisht i djegur mes rreshtave të një vreshti pranë Nîmes, në jug të Francës.
Ishte pikërisht “byzylyku” elektronik që i dyshuari mbante për shkak të së kaluarës së tij të dhunshme ai që ndihmoi hetuesit të rindërtonin lëvizjet e tij dhe ta gjurmonin pas vdekjes së të resë. Pajisja, e pajisur me GPS dhe e përdorur në Francë për mbikëqyrjen e autorëve me rrezik të lartë të dhunës në familje dhe zbatimin e urdhrave të distancimit, regjistroi të dhëna gjeografike që tashmë janë pjesë e provave të hetimit.
I dyshuari, emri i të cilit nuk bëhet publik për arsye ligjore, është nga Lille, në veri të Francës, rreth 600 milje larg zonës ku ndodhi krimi. Ai kishte precedentë për dhunë ndaj një partnereje dhe vepra të tjera të dhunshme, ndaj edhe vazhdonte të ishte nën monitorim elektronik kur, sipas hetuesve, u takua me Sonian më 10 gusht.
Trupi i 29-vjeçares u gjet dy ditë më vonë, më 12 gusht, nga një punëtor bujqësor në Saint-Gilles, pranë Nîmes. Ishte fshehur mes dy rreshtave të hardhive, ndërsa shenjat e dhunës dhe përpjekja për ta djegur trupin i orientuan hetuesit drejt një vrasjeje të kryer me brutalitet dhe një tentative për të zhdukur gjurmët.
Përveç të dhënave të pajisjes elektronike, sipas burimeve të hetimit të cituara nga The Sun, në trupin e Sonias është gjetur ADN që i përket të dyshuarit. Të dhënat telefonike tregojnë gjithashtu se ai kishte komunikuar vazhdimisht me të renë dhe se të dy ishin takuar dy herë.
Prokurorja e Nîmes, Cécile Gensac, ka konfirmuar se 32-vjeçari ishte “kontakti i fundit” i njohur i viktimës dhe se natën e ngjarjes ishte takuar me të në kuadër të një takimi për shërbime seksuale. Sonia kishte nisur të punonte si eskortë gjatë këtij viti, aktivitet që është i ligjshëm në Francë, dhe sipas artikullit ajo e kishte njohur të dyshuarin përmes një agjencie online.
Gjatë marrjes në pyetje, burri ka pranuar se kishte pasur kontakt me Sonian natën kur dyshohet se ndodhi krimi dhe një ditë më parë, por më pas ka refuzuar t’u përgjigjet pyetjeve të tjera të hetuesve. Të premten ai doli përpara një gjyqtari hetues dhe u la në paraburgim, ndërsa për akuzën e vrasjes rrezikon burgim të përjetshëm.
Hetuesit po përpiqen ndërkohë të rindërtojnë me hollësi orët e fundit të jetës së 29-vjeçares. Sonia ishte raportuar e zhdukur më 10 gusht dhe, sipas motrës së saj, ishte larguar nga apartamenti i familjes në Nîmes në orët e para të mëngjesit, duke thënë se do të shkonte për t’i dhënë fund një “marrëdhënieje toksike”.
Ajo kishte dalë pa marrë çantë me vete dhe u kishte thënë të afërmve se do të kthehej pas pak orësh. Familja, sipas burimeve të hetimit, nuk e njihte burrin me të cilin ajo do të takohej, pasi Sonia e kishte njohur vetëm kohët e fundit.
Hetimi është përqendruar në një interval prej rreth pesë orësh, nga momenti kur Sonia u largua nga banesa deri në kohën e përafërt të vdekjes. Kjo e fundit është përllogaritur duke marrë parasysh edhe momentin kur telefoni i saj u fik. Aparati u gjet më vonë i hedhur në anë të një rruge.
Një burrë tjetër ishte arrestuar më herët në kuadër të hetimeve, por autoritetet nuk gjetën prova për përfshirjen e tij dhe ai u lirua.
Sonia Bellina ishte lindur dhe rritur në Nîmes dhe ishte trajnuar si estetiste, me specializim në zgjatjen e qerpikëve, por ishte bërë e njohur kryesisht përmes rrjeteve sociale. Ajo numëronte më shumë se 250 mijë ndjekës në TikTok dhe ishte aktive edhe në Instagram dhe Snapchat, ku publikonte rregullisht video dhe përmbajtje nga jeta e saj.
Muajt e fundit ajo kishte kaluar gjithashtu shumë kohë në Paris, ndërsa fotografitë e publikuara në rrjetet e saj sociale e tregonin në kafene, restorante dhe dyqane të kryeqytetit francez. Pas vdekjes, llogaritë e saj në rrjetet sociale janë fshirë.
Familja e Sonias po përballet ndërkohë edhe me sulme ndaj kujtimit të saj në internet. Avokati Mourad Battikh, i cili përfaqëson familjen Bellina, ka bërë të ditur se po përgatit një kallëzim ligjor kundër personave që kanë publikuar fyerje online ndaj 29-vjeçares pas vdekjes së saj.
I dyshuari do të qëndrojë në paraburgim në pritje të procesit gjyqësor, ndërsa hetuesit po mbështeten te gjurmët biologjike, komunikimet telefonike dhe, në mënyrë të veçantë, te të dhënat e pajisjes elektronike që ai mbante për shkak të një historie të mëparshme dhune, për të përcaktuar saktësisht se çfarë ndodhi në orët e fundit të jetës së Sonia Bellinas.
