FIFA ka vendosur një seri sanksionesh ndaj Federatës Argjentinase të Futbollit, tre lojtarëve dhe një zyrtari të kombëtares, pas incidenteve të regjistruara gjatë Kupës së Botës 2026, mes të cilave edhe përleshja që shpërtheu pas finales së humbur ndaj Spanjës në Shtetet e Bashkuara.
Dënimin më të rëndë e ka marrë mesfushori argjentinas Leandro Paredes, i cili është pezulluar për 10 ndeshje nga Komiteti Disiplinor i FIFA-s dhe është gjobitur me 90 mijë dollarë. Mbrojtësi Nahuel Molina është pezulluar për shtatë ndeshje dhe është gjobitur gjithashtu me 90 mijë dollarë, ndërsa Thiago Almada është dënuar me një ndeshje pezullim dhe një gjobë prej 30 mijë dollarësh.
Masat nuk janë kufizuar vetëm te futbollistët. Roberto Ayala, zyrtar i kombëtares argjentinase, është pezulluar për tre ndeshje dhe është gjobitur me 30 mijë dollarë.
Edhe Spanja, e cila mposhti Argjentinën në finalen e Kupës së Botës muajin e kaluar, ka një lojtar të ndëshkuar për incidentin. Mesfushori Gavi është pezulluar për një ndeshje dhe është gjobitur me 30 mijë dollarë për përfshirjen e tij në përplasjen pas finales.
Përveç dënimeve individuale, FIFA ka gjobitur Federatën Argjentinase të Futbollit me 321 mijë dollarë për një sërë shkeljesh disiplinore të konstatuara gjatë turneut. Mes tyre përfshihet edhe shfaqja, pas gjysmëfinales kundër Anglisë, e një pankarte lidhur me Ishujt Falkland, të cilët në Argjentinë njihen si Malvinas dhe vazhdojnë të jenë objekt mosmarrëveshjeje.
Nga gjoba e vendosur ndaj federatës, 100 mijë dollarë duhet të përdoren për zbatimin e një plani kundër diskriminimit, ndërsa ekzekutimi i një pjese tjetër prej 100 mijë dollarësh është pezulluar dhe do të varet nga respektimi i një periudhe prove.
Argjentina është ndëshkuar edhe për ndeshjet e ardhshme në shtëpi. FIFA ka urdhëruar që dy takimet e ardhshme ku kombëtarja argjentinase do të jetë pritëse të zhvillohen me vetëm 50 për qind të kapacitetit të stadiumit.
Sipas FIFA-s, masat lidhen me disa kategori shkeljesh, mes të cilave “përdorimi i një ngjarjeje sportive për demonstrime të natyrës josportive”, diskriminimi, sjellja e pahijshme dhe mosrespektimi i rregullave të sigurisë.
Vendimet janë marrë pas përfundimit të procedurave disiplinore të hapura për incidentet e ndodhura gjatë Kupës së Botës 2026. FIFA ka bërë të ditur gjithashtu se sanksionet mund të apelohen në rastet kur rregulloret e lejojnë një procedurë të tillë.
