Rikthimi i shumëpritur i Conor McGregor në kafazin e UFC-së zgjati vetëm 69 sekonda, pasi irlandezi pësoi një dëmtim në gju gjatë duelit me Max Holloway në eventin UFC 329, të zhvilluar në Las Vegas.
37-vjeçari e nisi ndeshjen agresivisht me dy goditje të larta me këmbë, por të dyja rezultuan të pasakta. Gjatë tentativës së parë, gjuri i tij duket se u dëmtua, duke bërë që McGregor të rrëzohej në tapet.
Edhe pse u ngrit në këmbë, ai nuk mundi të ruante ekuilibrin. Gjyqtari Mike Beltran vendosi ta ndërpriste sfidën, duke i dhënë fitoren Max Holloway me nokaut teknik (TKO).
Kjo ishte paraqitja e parë e McGregor në UFC që nga viti 2021, kur theu këmbën në humbjen ndaj Dustin Poirier.
Për Holloway, fitorja shërbeu si hakmarrje për humbjen që kishte pësuar nga McGregor në përballjen e tyre të parë në vitin 2013, ndërsa rekordi i tij shkon në 28 fitore në 37 ndeshje.
“Ju jeni me fat, sepse tani do të ketë edhe një ndeshje të tretë Holloway-McGregor,” tha amerikani pas duelit.
“Kam punuar shumë për të arritur në këtë kategori peshe dhe mezi e prisja këtë përballje. Është zhgënjyese që përfundoi kështu. Duhet ta zhvillojmë edhe një herë.”
Megjithatë, humbja thellon krizën sportive të McGregor. Kjo ishte disfata e tij e shtatë në karrierë dhe e katërta në pesë ndeshjet e fundit, ndërsa që nga viti 2016 ai ka regjistruar vetëm një fitore në UFC.
Rikthimi i tij kishte ngjallur polemika edhe për shkak të problemeve jashtë kafazit. McGregor u rikthye pas një pezullimi 18-mujor për shkelje të rregullave antidoping, pasi kishte munguar në tre kontrolle brenda një viti. Ai është përballur gjithashtu me procese gjyqësore dhe polemika të shumta, çka kishte ngritur pikëpyetje nëse meritonte ende statusin e protagonistit në UFC.
Nga ana tjetër, Holloway vazhdon të konfirmohet si një nga emrat më të mëdhenj të këtij sporti. Ish-kampioni i peshës “featherweight”, i cili debutoi në kategorinë “welterweight” në këtë event, mbetet një nga luftëtarët më spektakolarë të UFC-së. Megjithatë, pas kësaj fitoreje të pazakontë, mbetet e paqartë nëse ai do të vazhdojë në këtë kategori apo do të rikthehet në peshën “lightweight”, ku konsiderohet një pretendent serioz për titullin.
