Partia Laburiste ka humbur kontrollin e këshillit bashkiak të Birminghamit pas 14 vitesh drejtimi, në një goditje të rëndë politike që po shihet si një tjetër sinjal i krizës së thellë që po përjeton partia në pushtet në Britaninë e Madhe.
Qyteti i dytë më i madh në Mbretërinë e Bashkuar u kthye në simbol të revoltës elektorale kundër establishmentit, ndërsa Reform UK e Nigel Farage, Partia e Gjelbër dhe kandidatët e pavarur pro-Gaza regjistruan fitore të forta.
Asnjë forcë politike nuk arriti shumicën absolute në këshillin me 101 vende, duke krijuar rrezikun e një administrimi të fragmentuar dhe potencialisht të paqëndrueshëm për një nga autoritetet lokale më të mëdha në Europë.
Rezultati vjen pas viteve të errëta për Birminghamin, që nga falimentimi zyrtar i këshillit në vitin 2023, shkurtimet drastike në shërbime, kriza financiare dhe grevat e zgjatura të pastrimit, të cilat kthyen qytetin në titull mediatik global për malet me mbeturina nëpër rrugë.
Laburistët humbën mbi 30 këshilltarë, ndërsa Reform UK fitoi 21 vende dhe të Gjelbrit 11. Ndërkohë, të pavarurit siguruan 10 mandate, shumë prej tyre duke ndërtuar fushatën mbi mesazhe pro-palestineze dhe kundër politikave tradicionale të partive të mëdha.
Lideri në largim i këshillit, laburisti John Cotton, pranoi humbjen dhe deklaroi se partia duhet të “dëgjojë me kujdes mesazhin e elektoratit”.
Ai u përpoq të mbrojë drejtimin e tij duke argumentuar se ishte detyruar të merrte “vendime të vështira” për të stabilizuar financat e bashkisë dhe për të përballuar problemet e trashëguara prej vitesh.
Por për shumë votues, zemërimi ndaj Laburistëve lidhet pikërisht me degradimin e qytetit dhe ndjesinë se Birmingham është lënë pa drejtim real.
Nosheen Khalid, një kandidate e pavarur e zgjedhur në zonën Alum Rock dhe e mbështetur nga partia e Jeremy Corbyn, deklaroi se qytetarët “kishin pasur mjaft” me Laburistët.
“Partia Laburiste ka shkaktuar shumë dëme në Birmingham”, tha ajo, duke përmendur falimentimin e bashkisë dhe shkatërrimin e shërbimeve për të rinjtë.
Khalid paralajmëroi se qyteti “nuk është qeverisur siç duhet prej kohësh”, ndërsa përjashtoi çdo bashkëpunim me Reform UK, të cilën e cilësoi si një forcë “përçarëse”.
Rezultatet në Birmingham pasqyrojnë edhe fragmentimin më të madh politik që po përjeton Anglia, ku Laburistët po humbin terren si nga e djathta populiste e Farage, ashtu edhe nga kandidatë lokalë dhe lëvizje identitare që po kapitalizojnë zemërimin social dhe çështje si Gaza, varfëria dhe degradimi urban.
Në qytetin që dikur konsiderohej një bastion i sigurt laburist, votuesit duket se kanë vendosur të ndëshkojnë establishmentin politik për krizën ekonomike, shërbimet në kolaps dhe një administratë që për shumëkënd ka humbur kontaktin me realitetin e përditshëm të qytetarëve.
