Një tjetër rritje çmimesh ka prekur tregun e karburanteve në Shqipëri. Bordi i Transparencës ka vendosur rritjen e çmimit të naftës dhe benzinës, duke reflektuar luhatjet e fundit në tregjet ndërkombëtare.
Sipas vendimit të ri, nafta do të tregtohet me maksimumi 197 lekë për litër, nga 193 lekë që ishte deri më tani, duke regjistruar një rritje prej 4 lekësh.
Ndërkohë, benzina do të shitet me 182 lekë për litër, ose 3 lekë më shumë krahasuar me çmimin e mëparshëm prej 179 lekësh.
Për shitjen me shumicë, tavani i vendosur është 185 lekë/litër për gazoilin dhe 170 lekë/litër për benzinën.
Autoritetet paralajmëruan operatorët e tregut se zbatimi i çmimeve është i detyrueshëm dhe se çdo shkelje do të sjellë masa administrative deri në pezullim aktiviteti.
Në njoftimin zyrtar, institucionet përgjegjëse argumentojnë se çmimet aktuale mbeten ende poshtë pragut të përcaktuar nga akti normativ i miratuar në prill, i cili parashikon ulje të akcizës vetëm nëse nafta kalon 220 lekë/litër dhe benzina 200 lekë/litër.
Kjo do të thotë se, pavarësisht rritjes së re, akciza do të vazhdojë të aplikohet në nivel të plotë, pra 100%.
Rritja vjen në një moment kur tensionet në Lindjen e Mesme dhe situata në Ngushticën e Hormuzit kanë krijuar pasiguri në tregjet globale të energjisë, duke ushtruar presion mbi çmimet e naftës dhe derivateve në shumë vende.
