Presidenti amerikan Donald Trump ka emëruar Bill Pulte, drejtuesin e Agjencisë Federale të Financimit të Strehimit, si drejtor të përkohshëm të Inteligjencës Kombëtare të SHBA-së (DNI), një vendim që ka shkaktuar debat të fortë në Uashington për shkak të mungesës së përvojës së tij në fushën e sigurisë dhe inteligjencës.
Pulte, një biznesmen i pasur që më vonë u bë drejtues i agjencisë federale të strehimit, do të zëvendësojë përkohësisht Tulsi Gabbard, e cila njoftoi largimin nga detyra për arsye familjare pas diagnostikimit të bashkëshortit të saj me një formë të rrallë kanceri në kocka.
Emërimi ka habitur edhe një pjesë të aleatëve të Trumpit. Një ish-zyrtar i administratës republikane ironizoi vendimin duke deklaruar se “ndërtimi i shtëpive është shumë i ngjashëm me drejtimin e një komuniteti inteligjence me 17 agjenci”.
Në njoftimin e bërë në rrjetin e tij Truth Social, Trump mbrojti zgjedhjen e Pulte-s, duke vlerësuar përvojën e tij në menaxhimin e çështjeve të ndjeshme financiare dhe mbikëqyrjen e mbi 10 trilionë dollarëve të lidhura me gjigantët amerikanë të hipotekave Fannie Mae dhe Freddie Mac.
Megjithatë, kritikët theksojnë se drejtimi i Inteligjencës Kombëtare kërkon eksperiencë të thellë në sigurinë kombëtare, analizën e informacionit sekret dhe koordinimin e agjencive të inteligjencës, fusha ku Pulte nuk ka një histori të njohur profesionale.
Gjatë muajve të fundit, Pulte është bërë një figurë e njohur politike për shkak të denoncimeve që ka bërë ndaj disa prej kundërshtarëve politikë të Trumpit. Ai ka kërkuar hetime për mashtrim financiar ndaj Prokurores së Përgjithshme të Nju Jorkut Letitia James, senatorit Adam Schiff, kongresmenit Eric Swalwell dhe prokurores së qarkut Fulton, Fani Willis. Të gjithë kanë mohuar akuzat.
Këto veprime kanë ushqyer akuzat se administrata Trump po përdor institucionet federale për të goditur kundërshtarët politikë. Madje Zyra Amerikane e Auditimit të Qeverisë ka hapur një shqyrtim lidhur me përdorimin e kompetencave nga ana e Pulte-s.
Senatori demokrat Mark Warner, anëtari më i lartë demokrat në Komisionin e Inteligjencës në Senat, reagoi ashpër ndaj emërimit.
“Ky emërim tregon qartë se çfarë pret presidenti nga zyrtari më i lartë i inteligjencës në vend. Në vend të një profesionisti të respektuar të sigurisë kombëtare, ai ka zgjedhur një person që ka treguar gatishmëri për të përdorur pushtetin shtetëror për hakmarrje politike”, deklaroi Warner.
Nga ana tjetër, zëvendëspresidenti JD Vance mbrojti zgjedhjen e Trumpit, duke argumentuar se Pulte kupton se burokracia e inteligjencës duhet t’u përgjigjet institucioneve të zgjedhura demokratikisht dhe jo anasjelltas.
Kjo nuk është hera e parë që Trump zgjedh një besnik politik për të drejtuar përkohësisht inteligjencën amerikane. Gjatë mandatit të tij të parë, ai emëroi Ric Grenell në të njëjtin post, pavarësisht mungesës së përvojës direkte në komunitetin e inteligjencës.
Për momentin mbetet e paqartë se sa kohë do të qëndrojë Pulte në krye të Inteligjencës Kombëtare, pasi Trump ka deklaruar se ai do të mbajë detyrën deri në emërimin dhe konfirmimin nga Senati të një drejtori të përhershëm.
Burimi: CNN
