Për më shumë se 15 vjet, Franca vazhdon të jetë e përfshirë nga një prej mistereve kriminale më të errëta dhe më të pazgjidhura të historisë së saj moderne. Xavier Dupont de Ligonnès, një biznesmen francez dhe baba i katër fëmijëve, dyshohet se vrau të gjithë familjen e tij, i varrosi trupat nën shtëpi dhe më pas u zhduk pa lënë gjurmë.
Sot, pas më shumë se një dekade kërkimesh, një zbulim i ri ka rikthyer çështjen në qendër të vëmendjes. Hetues dhe gazetarë francezë po shqyrtojnë mundësinë që njeriu më i kërkuar i Francës mund të jetë ende gjallë.
Në pamje të parë, familja Dupont de Ligonnès dukej krejtësisht normale. Ata jetonin në periferi të qytetit Nantes. Xavier punonte në sektorin e reklamave dhe guidave turistike, ndërsa bashkëshortja e tij Agnès ishte asistente në një shkollë dhe jepte mësime katekizmi. Katër fëmijët e tyre – Arthur, Thomas, Anne dhe Benoît – ndiqnin shkollën dhe universitetin.
Por më 21 prill 2011, policia bëri një zbulim makabër.
Pas shqetësimit të të afërmve dhe miqve që nuk po merrnin asnjë përgjigje prej familjes, autoritetet hynë në shtëpinë e tyre. Nën verandë gjetën trupat e Agnès-it, katër fëmijëve dhe madje edhe dy qenve të familjes. Të gjithë ishin varrosur nën beton, të mbështjellë në thasë dhe të mbuluar me gëlqere për të përshpejtuar dekompozimin. Autopsia tregoi se viktimat ishin qetësuar me ilaçe dhe më pas ishin qëlluar në kokë. Kur u zbuluan, kishin më shumë se dy javë të vdekur.
Një person mungonte: Xavier Dupont de Ligonnès.
Shumë shpejt ai u kthye në të dyshuarin kryesor. Arma e përdorur në krim ishte një armë që ai e kishte trashëguar së fundmi. Për më tepër, faturat dhe blerjet me kartë bankare e lidhnin drejtpërdrejt me materialet e përdorura për varrosjen e viktimave.
Familjarët morën edhe një letër të pazakontë.
Në të, Xavier pretendonte se kishte punuar fshehurazi për Agjencinë Amerikane kundër Drogës (DEA) dhe se identiteti i tij ishte zbuluar. Sipas letrës, e gjithë familja ishte futur në një program sekret mbrojtjeje dhe ishte transferuar në një vend të ngrohtë me identitete të reja. Ai shpjegonte se nuk do të mund të kontaktonin askënd për disa vite dhe jepte udhëzime për shitjen ose shpërndarjen e sendeve të familjes.
Edhe punëdhënësi i bashkëshortes mori mesazhe të çuditshme ku thuhej fillimisht se ajo ishte shtruar në spital, e më pas se po largohej nga puna sepse familja po transferohej në Australi për një mundësi të jashtëzakonshme profesionale.
Kur policia nisi kërkimet, Xavier kishte tashmë një avantazh prej 17 ditësh qё ishte larguar.
Megjithatë, falë kamerave të sigurisë, faturave të hoteleve dhe pagesave me kartë, hetuesit arritën të rindërtonin një pjesë të itinerarit të tij. Gjurmët e fundit të konfirmuara e vendosin atë më 15 prill 2011 në Roquebrune-sur-Argens, në jug të Francës. Pamjet e kamerave tregojnë Xavier-in duke lënë makinën në një parking dhe duke u larguar në këmbë. Që nga ai moment, askush nuk e ka parë më zyrtarisht.
Prej atëherë janë ngritur teori të panumërta.
Disa besojnë se ai vrau veten menjëherë pas largimit. Të tjerë janë të bindur se ai arriti të largohej jashtë vendit dhe po jeton me një identitet të ri. Aq e famshme është bërë çështja sa në Francë është krijuar edhe një shprehje popullore: “Të bësh një Xavier Dupont de Ligonnès”, që do të thotë të zhdukesh pa lënë asnjë gjurmë.
Këtë javë, misteri mori një kthesë të re.
Gazeta franceze Ouest-France publikoi rezultatet e një hetimi që sugjeron se Xavier mund të ketë lënë gjurmë dixhitale vite pas zhdukjes së tij. Gazetarët analizuan aktivitetin në një forum katolik ku ai kishte qenë aktiv përpara vitit 2011. Sipas tyre, është identifikuar një llogari e dyshuar, e cila vazhdoi të postonte deri në vitin 2017, gjashtë vjet pas masakrës.
Ekspertët e stilometrisë – shkencës që analizon mënyrën e të shkruarit – konstatuan ngjashmëri të forta mes kësaj llogarie dhe mesazheve të mëparshme të Xavier-it. Përdorimi i të njëjtave struktura gjuhësore, i njëjti stil pikësimi dhe referenca pothuajse identike ndaj disa pasazheve biblike kanë shtuar dyshimet se pas profilit mund të fshihej pikërisht ai.
Megjithatë, edhe vetë gazeta thekson se bëhet fjalë vetëm për indicie dhe jo për prova përfundimtare.
Deri më sot, policia franceze ka marrë mbi 1,850 sinjalizime për vendndodhjen e mundshme të Xavier Dupont de Ligonnès. Ka pasur raportime nga Franca, Belgjika, Italia, Skocia, Shtetet e Bashkuara dhe vende të tjera. Asnjëra prej tyre nuk ka çuar në arrestimin ose identifikimin e tij.
Pesëmbëdhjetë vjet pas krimit që tronditi Francën, pyetja mbetet e njëjtë: a ka vdekur Xavier Dupont de Ligonnès prej kohësh, apo ёshtё arratisur dhe vazhdon të jetojë i fshehur diku në botë?
Për momentin, askush nuk ka një përgjigje.
Burimi: France 24
