Ajo që deri pak vite më parë dukej e pamundur është kthyer tashmë në një traditë të re verore për kryeqytetin francez.
Autoritetet e Parisit kanë konfirmuar se edhe gjatë verës së vitit 2026 qytetarët dhe turistët do të mund të notojnë në lumin Sena, për të dytin vit radhazi, pas suksesit të projektit historik që riktheu larjen në lumë për herë të parë pas më shumë se një shekulli ndalimi.
Sezoni i notit do të hapet zyrtarisht më 4 korrik, kur tre zona të posaçme përgjatë Senës do të jenë të disponueshme për publikun.
Mes tyre do të jetë zona e njohur e Bras de Grenelle pranë Kullës Eiffel, Bras Marie pranë Katedrales Notre-Dame dhe zona e Bercy-t në pjesën lindore të kryeqytetit.
Rikthimi i notarëve në Senë konsiderohet një nga sukseset më të mëdha urbane dhe mjedisore të Parisit modern.
Për dekada me radhë lumi ishte konsideruar tepër i ndotur për aktivitete rekreative. Megjithatë, përgatitjet për Lojërat Olimpike Paris 2024 detyruan autoritetet franceze të ndërmarrin një nga projektet më ambicioze të pastrimit të ujërave në Europë.
Më shumë se një miliard euro u investuan për përmirësimin e kanalizimeve, reduktimin e ndotjes dhe garantimin e cilësisë së ujit.
Rezultatet u panë menjëherë.
Verën e kaluar rreth 100 mijë persona pritën në radhë për t’u zhytur në ujërat e Senës, pavarësisht se reshjet e shiut gjatë javëve të para krijuan disa probleme të përkohshme me cilësinë e ujit.
Entuziazmi nuk u kufizua vetëm në Paris.
Edhe lumi Marne, në periferi të kryeqytetit francez, u rikthye si destinacion për notuesit. Vitin e kaluar rreth 50 mijë persona u lanë në zonat e përcaktuara përgjatë lumit.
Këtë vit do të hapen sërish plazhet urbane në Joinville-le-Pont, Champigny-sur-Marne, Saint-Maur-des-Fossés dhe Maisons-Alfort, ndërsa do të shtohet edhe një pikë e pestë në Neuilly-sur-Marne, në verilindje të Parisit.
Autoritetet franceze kanë kujtuar se noti lejohet vetëm në zonat e monitoruara dhe të pajisura me roje bregdetare, duke paralajmëruar qytetarët të mos futen në pjesë të tjera të lumenjve ku nuk garantohen kushtet e sigurisë.
Për shumë francezë, rikthimi i notit në Senë është shumë më tepër sesa një mundësi për t’u freskuar gjatë vapës.
Ai konsiderohet simbol i suksesit të një projekti që arriti të transformojë një lumë të ndotur në një hapësirë publike të përdorshme, duke treguar se investimet afatgjata në mjedis mund të japin rezultate konkrete.
Ndërsa Europa përballet me temperatura gjithnjë e më të larta dhe valë të nxehti më të shpeshta, Sena po shndërrohet gradualisht në një nga atraksionet më të pazakonta verore të kontinentit: një lumë ku mund të notosh në zemër të një prej metropoleve më të mëdha të botës.
Burimi: France 24 / AFP
