Mbi dy milionë qytetarë të Kosovës me të drejtë vote po i drejtohen sot kutive të votimit në zgjedhjet e parakohshme parlamentare, të cilat vijnë pas krizës institucionale të shkaktuar nga dështimi i Kuvendit për zgjedhjen e presidentit.
Këto janë zgjedhjet e treta parlamentare që mbahen në Kosovë në më pak se një vit e gjysmë, ndërsa vlerësohen si vendimtare për drejtimin politik të vendit në katër vitet e ardhshme.
Sipas të dhënave paraprake të Komisionit Qendror të Zgjedhjeve, deri në orën 11:00 kanë votuar 162,439 qytetarë, ose 8.29% e elektoratit. KQZ ka bërë të ditur se procesi zgjedhor po zhvillohet normalisht dhe pa incidente serioze.
“Procesi i votimit po zhvillohet sipas planifikimeve. Deri tani votimi po zhvillohet në kushte të rregullta dhe pa probleme”, deklaroi kryetari i KQZ-së, Kreshnik Radoniqi.
Gjatë paradites, drejtuesit e partive kanë ushtruar të drejtën e votës dhe kanë bërë thirrje për pjesëmarrje sa më të lartë të qytetarëve.
Kryeministri aktual Albin Kurti tha se pjesëmarrja e lartë forcon legjitimitetin e institucioneve.
“Sa më e lartë të jetë dalja e qytetarëve në zgjedhje, aq më i madh është legjitimiteti i institucioneve dhe aq më solid stabiliteti i tyre”, deklaroi ai.
Nga ana tjetër, kandidati i Partisë Demokratike të Kosovës, Bedri Hamza, i ftoi qytetarët të votojnë sipas bindjeve të tyre politike.
“Ne sot vendosim për të ardhmen e katër viteve të ardhshme”, tha Hamza pas votimit.
Edhe kandidati i Lidhjes Demokratike të Kosovës, Lumir Abdixhiku, e cilësoi ditën e sotme si një festë të demokracisë dhe shprehu pritshmëri për pjesëmarrje masive.
Ndërsa kandidati i Aleancës për Ardhmërinë e Kosovës, Ardian Gjini, deklaroi se qytetarët duhet “ta marrin Kosovën në duart e veta” përmes votës.
Procesi nuk ka kaluar pa incidente. Në Shtime, policia ka nisur hetime ndaj një qytetari që dyshohet se ka dëmtuar fletëvotimin e tij dhe ka tentuar të votojë edhe në emër të bashkëshortes. Sipas autoriteteve, ai është shoqëruar në stacion policor dhe ndaj tij është iniciuar procedurë për veprën penale “Asgjësim i dokumentit të votimit”.
Qendrat e votimit do të qëndrojnë të hapura deri në mbrëmje, ndërsa rezultatet e para priten menjëherë pas mbylljes së procesit.
