Filmi “Shame and Money”, me regji të regjisorit kosovar Visar Morina, është përzgjedhur zyrtarisht për t’u shfaqur në edicionin e sivjetmë të Karlovy Vary International Film Festival, një nga festivalet më prestigjioze të filmit në Evropën Qendrore.
Ky sukses vjen pas rrugëtimit të suksesshëm ndërkombëtar të filmit, i cili pati premierën botërore në Sundance Film Festival, ku fitoi çmimin e madh “World Cinema Grand Jury Prize: Dramatic”.
“Shame and Money” është një dramë sociale që rrëfen historinë e një familjeje nga Kosova, e cila përballet me vështirësi ekonomike dhe sfidat e ruajtjes së dinjitetit përballë pabarazive sociale. Filmi ndjek jetën e Shabanit dhe Hatixhes, të interpretuar nga aktorët Astrit Kabashi dhe Flonja Kodheli, të cilët detyrohen të lënë jetën e tyre në fshat dhe të nisin një kapitull të ri në kryeqytet.
Filmi është bashkëprodhim ndërmjet Kosovës, Gjermanisë, Sllovenisë, Shqipërisë, Maqedonisë së Veriut dhe Belgjikës, ndërsa skenari është shkruar nga Visar Morina në bashkëpunim me Doruntina Basha.
Përzgjedhja në Karlovy Vary përbën një tjetër arritje të rëndësishme për kinematografinë kosovare, duke e vendosur filmin dhe ekipin krijues në qendër të vëmendjes së industrisë ndërkombëtare të filmit.
Burimi: KultPlus.com
