Diplomacia amerikane rrallë i zgjedh fjalët kuturu. Kur Ambasada e SHBA-së në Tiranë shkruan se “një kapitull i ri nis në Shqipëri”, në ditën kur marinsat ngritën flamurin mbi rezidencën zyrtare, mesazhi shkon përtej ceremonisë. Ai u drejtohet atyre që duhet ta lexojnë, dhe në Tiranë të gjithë e dinë kush janë.
Një kapitull i ri do të thotë se diçka mbyllet. Ambasada ka qenë pa ambasador të plotë për rreth tre vjet, që kur Yuri Kim u largua më 2023, dhe e drejtuan të ngarkuar me punë e përfaqësues të përkohshëm. Në këto vite, Rama u mësua me një Amerikë të largët, që fliste me deklarata të matura e rrallë i prishte qetësinë. Ajo periudhë, sipas Ambasadës vetë, përfundoi sot.
Fjalia e dytë e statusit peshon edhe më shumë. Aleancat janë më të forta kur “ndajmë përgjegjësitë”. Në gjuhën e administratës Trump kjo nuk është mirësjellje, por kusht. Aleati duhet të japë, jo vetëm të marrë, qoftë në mbrojtje, në luftën kundër krimit të organizuar apo në hapjen e ekonomisë për kompanitë amerikane. Partneriteti nuk matet më me foto e përqafime, por me atë që sjell secila palë në tryezë.
Në krye të këtij kapitulli nuk vjen një diplomat karriere, por një gjeneral me tre yje që ka komanduar forcat speciale të NATO-s. Uashingtoni zgjodhi një njeri që di të japë urdhra, jo vetëm të lexojë komunikata. E në të njëjtën javë kur Rama u kthye nga Nju Jorku pa asnjë takim me administratën amerikane, Ambasada flet për fillim të ri pa e përmendur fare Kryeministrinë.
Shqipëria i ka dëgjuar shpesh fjalët e mëdha nga Amerika, e shumë herë ato mbetën në letër. Por këtë herë toni është më i ftohtë, më ushtarak, më pak i ëmbël. Nëse ky kapitull do të shkruhet me shtrëngime dore apo me kërkesa të prera, do ta tregojnë muajt në vijim.
Deri atëherë, flamuri u ngrit dhe në Tiranë dikush duhet ta ketë vënë re nga dritarja.
